Rasija admoviłasia pravodzić junijorski ČS i etap Kubka śvietu pa bijatłonie
Rasija apaviaściła Mižnarodny sajuz bijatłanistaŭ (IBU), što nie budzie ŭ 2017 hodzie pravodzić junijorski čempijanat śvietu, jaki pavinien byŭ prajści ŭ Vostravie, i etap Kubka śvietu pa bijatłonie ŭ Ciumieni. Pra heta paviedamlajecca na sajcie IBU. Taksama dvoje rasijskich bijatłanistaŭ byli adchilenyja ad spabornictvaŭ, paviedamlaje telekanał Dožd́.
Rašeńnie ab tym, dzie buduć pravodzicca hetyja spabornictvy budzie pryniata paźniej. Adnym ź miescaŭ etapu Kubka śvietu nazyvalisia i Raŭbičy.
«Heta važny krok dla Rasijskaha sajuza bijatłanistaŭ - pakazać śvietu i IBU, što situacyja zaraz vielmi surjoznaja. Heta dapamoža mižnarodnaj siamji bijatłanistaŭ zasiarodzicca na sporcie padčas usich hetych padziej», - skazaŭ prezident IBU Anders Biesiebierh.
Taksama IBU pačaŭ rasśledavańnie ŭ dačynieńni da 29 rasijskich bijatłanistaŭ, jakija byli zhadanyja ŭ dakładzie Suśvietnaha antydopinhavaha ahienctva (WADA) pra dopinh u rasijskim sporcie. Rasśledavańnie taksama pačniecca i ŭ dačynieńni da Rasijskaha sajuza bijatłanistaŭ. Akramia taho, IBU pryniaŭ rašeńnie časova adchilić ad spabornictvaŭ dvuch rasijskich bijatłanistaŭ, u dačynieńni da jakich było ŭžo adkryta rasśledavańnie Mižnarodnym alimpijskim kamitetam. Imiony hetych spartsmienaŭ nie nazyvajucca.
