«Спорт у таблетцы». Навукоўцы распрацавалі прэпарат, які «замяняе» фізічныя практыкаванні
Каманда даследчыкаў з ЗША стварыла біяхімічнае злучэнне, якое можа «падмануць» арганізм чалавека і даць яму эфект ад заняткаў спортам без неабходнасці рабіць фізічныя практыкаванні. Але ці заменіць гэта спорт цалкам? Навукоўцы патлумачылі.
Ілюстрацыйная выява. Фота: «Наша Ніва»
Як паведамляе партал ZME Science, навукоўцы з ЗША распрацавалі прэпарат, які дае арганізму эфект ад фізічных практыкаванняў без неабходнасці займацца спортам. Распрацоўка прэпарата доўжылася больш за 10 гадоў, а сам ён быў паспяхова пратэставаны на грызунах.
«У аснове прэпарата ляжыць навастворанае біяхімічнае злучэнне пад кодавай назвай SLU-PP-332, якое прыводзіць у дзеянне ўсе тры віды бялкоў ERR (экстраген — звязаныя рэцэптары). Гэтыя бялкі ў звычайных умовах актывуюцца толькі падчас фізічных практыкаванняў і адыгрываюць асноўную ролю ў кіраванні рэакцыяй арганізма на фізічную нагрузку і паляпшэнні метабалізму», — расказалі парталу ZME Science распрацоўшчыкі прэпарата.
Навукоўцы адзначылі, што эфект ад прэпарата «моцна нагадвае» эфект ад заняткаў спортам, і што гэта адкрывае новыя магчымасці для змагання з атлусценнем, сардэчнай недастатковасцю, зніжэннем функцый нырак і нават з хваробай Альцгеймера.
У будучыні прэпарат плануецца выпускаць у звычайных таблетках.
«Аднак гэта не заменіць усе перавагі ад фізічнай актыўнасці і спорту, бо прэпарат лепш за ўсё дзейнічае менавіта ў сукупнасці з фізічнымі практыкаваннямі, як узмацняльнік.
Да таго ж прэпарат ствараўся намі ў першую чаргу для тых, хто не мае фізічнай магчымасці займацца спортам», — падагульнілі навукоўцы.
Чытайце таксама:
У ЗША ін'екцыі для пахудання афіцыйна ўхвалілі ў якасці лекаў пры сардэчных захворваннях
Ультраапрацаваныя прадукты могуць уплываць не толькі на наша цела, але і на мозг — навукоўцы
