Жанчыну асудзілі да «хатняй хіміі» і вялікага штрафу за допіс у фэйсбуку
13 сакавіка ў судзе Баранавічаў і Баранавіцкага раёна прайшоў суд над Таццянай Макаравай. Жанчыну прызналі вінаватай паводле ч. 3 арт. 203-1 Крымінальнага кодэкса (незаконныя дзеянні ў дачыненні да інфармацыі пра прыватнае жыццё і персанальных даных), піша «Вясна».
Жанчыну асудзілі да двух з паловай гадоў абмежавання волі без накіравання ў ПУАТ («хатняй хіміі»). Таксама ёй прызначылі штраф у памеры 4000 рублёў (100 базавых велічыняў).
Адметна, што пасяджэнне адбывалася не ў будынку суда, а ў Баранавіцкім машынабудаўнічым каледжы. Справу разглядзела суддзя Сафія Хвалько.
Таццяну Макараву прызналі вінаватай у тым, што яна распаўсюдзіла ў фэйсбуку інфармацыю пра персанальныя даныя оперупаўнаважанага крымінальнага вышуку АУС Магілёўскага райвыканкама. Жанчына сваю віну прызнала.
Як мяркуецца, да суда жанчыну трымалі ў Баранавіцкім СІЗА №6: сама яна жыве ў Ляхавіцкім ці Лунінецкім раёне, але ў снежні 2023 года яе двойчы судзілі ў Баранавіцкім судзе паводле арт. 19.11 КаАП (прычым другі раз судзілі па скайпе). Гэта вынікае з пастаноў Баранавіцкага суда ў дачыненні да Макаравай. Па тых адміністрацыйных справах жанчыне давалі 10 сутак арышту, штраф на 20 базавых (740 рублёў) і канфіскавалі тэлефон.
Чытайце таксама:
Ірыне Сапрыгінай з Мазыра прысудзілі абмежаванне волі і вызвалілі ў зале суда
У Ашмянах маці васьмярых дзяцей аштрафавалі на 1000 рублёў за падпіску на «экстрэмісцкія СМІ»
Сілавікі затрымалі настаўніка, які «прымушаў школьніка зняць вайсковую форму»
