Statystyka: biełarusy na zarpłatu mohuć kupić 396 ł paliva. A inšyja?

Cikavyja dadzienyja pryvodzić «RIA Naviny». Infarmahienctva prasačyła dynamiku źmianieńnia cen na paliva za pieršyja paŭhoda 2012 i padličyła, kolki litraŭ bienzinu moža kupić za siaredniuju zarpłatu žychar toj ci inšaj krainy. Miarkujučy z hetych dadzienych, u Jeŭropie samaje tannaje paliva ŭ Biełarusi (nižejšyja ceny tolki ŭ Rasii). Pry hetym mienavita ŭ našaj krainie adbyŭsia najbolšy rost cenaŭ na bienzin AI-95 i dyzpaliva.

Ceny ŭ 4-j i 5-j hrafie paznačanyja ŭ rasijskich rublach.

Samy darahi bienzin u Narviehii. Tam 1 litr (imavierna, havorka idzie pra AI-95) abychodzicca ŭ $2,43. U nas — u $0,88 (treba zaŭvažyć, što hetaja suma pastajanna varjujecca praz vahańni na valutnym rynku), u Rasii — u $0,86. U inšych susiedziaŭ paliva kaštuje značna daražej: Ukraina — $1,34, Łatvija — $1,67, Polšča — $1,68, Litva — $1,71.

Mnohija spraviadliva zaŭvažajuć, što i zarpłaty ŭ mnohich jeŭrapiejskich krainach zusim inšyja. Tamu infarmahienctva padličyła, kolki litraŭ bienzinu moža kupić za siaredniuju zarpłatu žychar toj ci inšaj krainy. Absalutny lidar pa hetym pakazčyku — Luksiemburh. Čystaj siaredniaj zarpłaty (z vylikam padatkaŭ) žychara hetaj krainy chopić na 2248 litraŭ bienzinu. Dla paraŭnańnia: biełarus zmoža kupić 396 ł. Zrešty, heta nie samy nizki pakazčyk u Jeŭropie. Siaredniaja zarpłata ŭkrainca ekvivalentnaja 214 ł bienzinu, bałharyna — 216 ł, rumyna — 267 ł, litoŭca — 323 ł, vienhierca — 356 ł, łatyša — 357 ł.

Cikava taksama, što najbolšy rost cenaŭ na paliva ŭ paraŭnańni sa śniežniem 2011 hoda adbyŭsia mienavita ŭ Biełarusi. Pavodle dadzienych «RIA Naviny», cana na AI-95 vyrasła na 19,7%, na dyzpaliva — na 13,5% (miarkujučy pa ŭsim, uličvałasia roźnica cenaŭ u valucie). Ni ŭ adnoj jeŭrapiejskaj krainie cana paliva tak prykmietna ŭ pakazany čas nie źmianiałasia. Bolš za toje, u mnohich krainach ceny na dyzpaliva źnižalisia (naprykład, u Estonii — na 6,8%, u Bielhii — na 4,4%).

rian.ru

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH

0

0

0

0

0

0