U ZŠA adna z sijamskich bliźniat vyjšła zamuž. Druhaja zastajecca ŭ pošuku
Tajemnaje viasielle adbyłosia jašče try hady tamu, a ciapier siamja zadumvajecca pra dziaciej.
Ebi Chiensieł (na fota źleva) z mužam Džošam Boŭlinham. Fota: sacyjalnyja sietki
Jak piša Daily Mail, amierykanskija siostry Ebi i Brytani Chiensieł źjaŭlajucca adnymi ź niamnohich sijamskich bliźniat-dycefałaŭ (h. zn. u jakich adno tułava i dźvie hałavy), jakija vyžyli ŭ malenstvie i ščaśliva dažyli da siaredniaha ŭzrostu.
Siostry naradzilisia 7 sakavika 1990 hoda ŭ štacie Miniesota. Adrazu paśla naradžeńnia daktary papiaredzili ich baćkoŭ, što dzieci naŭrad ci pieražyvuć hetuju noč. Ale prahnoz akazaŭsia pamyłkovym.
Baćki dumali raźjadnać siaścior u rańnim dziacinstvie, ale była vialikaja ryzyka, što adna ź bliźniat abo abiedźvie nie pieražyvuć apieracyju. Tamu ad jaje admovilisia.
Siostry taksama ašałamili lekaraŭ svajoj dziŭnaj kaardynacyjaj pry hulni na fartepijana i zaniatkach sportam. Kožnaja kantraluje adzin bok cieła: Ebi — pravy, a Brytani — levy. U svoj 16-y dzień naradžeńnia jany zdali ekzamien pa kiravańni.
Jak adznačaje vydańnie, kali siostry raśli, u ich, jak i ŭ mnohich bliźniat, byli vielmi roznyja charaktary i husty. Ebi, dziorzkaja i ŭpartaja, lubiła na śniadanak apielsinavy sok, a Brytani, žartaŭnica ŭ siamji, dakranałasia tolki da małaka.
«Kali sprava dachodzić da rašeńniaŭ, nam davodzicca iści na kampramisy. My chočam zrabić tak, kab kožnaja z nas była ščaślivaja, i my znachodzim załatuju siaredzinu», — cytuje vydańnie słovy Ebi.
Para moža jeści, pisać i vykonvać zadańni asobna adna ad adnoj, ale dzielić adno cieła i ŭsie orhany nižej za pojas, u tym liku kišečnik, mačavy puzyr i repraduktyŭnyja orhany. Heta aznačaje, što jany mohuć začać dzicia tradycyjnym sposabam, ale niezrazumieła, chto pa zakonie budzie maci.
Ebi i Brytani ŭpieršyniu skaryli śviet u 1996 hodzie, kali jany źjavilisia na papularnym telešou i na vokładcy časopisa Life. Zatym jany žyli spakojnym, narmalnym žyćciom sa svajoj siamjoj, trymajučysia dalej ad uvahi miedyja, pakul nie pahadzilisia źjavicca ŭ dakumientalnym filmie TLC, kali im było 16 hadoŭ.
Ciapier im 34 hady. Siostry pracujuć u škole nastaŭnicami matematyki. Jany zaŭsiody ŭstrymlivalisia ad śpiekulacyj ab svaim asabistym žyćci. Tamu pra viasielle paviedamili publicy tolki praz try hady. Jano było apublikavana ŭ aficyjnym akaŭncie siaścior u tyktoku.
Abrańnikam Ebi staŭ 33-hadovy miedbrat Džoš Boŭlinh. Chutčej za ŭsio siostry paznajomilisia ź im, kali prachodzili rehularny ahlad ci lačeńnie ŭ špitali. Ad pieršaha šlubu ŭ Džoša jość maleńkaja dačka.
Siostry nie raz pryznavalisia, što marać ab dziciaci. «Usiamu śvietu nieabaviazkova viedać, z kim my sustrakajemsia, što my robim. Ale paviercie mnie, my zusim roznyja ludzi. Tak, adnojčy my staniem mamami, ale pakul nie chočam kazać pra toje, jak heta budzie pracavać», — cytuje vydańnie słovy bliźniat.
Čytajcie jašče:
U Brazilii raździalili sijamskich bliźniataŭ, jakija zraślisia čarapami
Mužčyny-bliźniaty admovilisia pryznacca, chto ź ich baćka dziciaci. Płacić alimienty buduć abodva
