«Ja tvoj baćka». U Danieckaj vobłaści ŭ bai syšlisia syn-ukrainiec i baćka-rasijanin, jaki kinuŭ jaho jašče małym
Alaksandr — kamandzir ekipaža Bradley, vajskoviec 47-j bryhady USU. Jaho ekipaž padbiŭ dva rasijskija tanki. Jaho sasłužyŭcy na aŭdziejeŭskim napramku ŭ Danieckaj vobłaści na Bradley ŭstupili ŭ boj z rasijskim tankam i źniščyli jaho. Rasijanie pryznačyli ŭznaharodu za źniščeńnie kožnaha člena ŭkrainskaha ekipaža — pa piać tysiač dołaraŭ. Dziakujučy hetaj viadomaści Alaksandr sustreŭsia na froncie sa svaim baćkam — tankistam, jaki vajavaŭ u składzie rasijskich uzbrojenych sił. Historyju raskazała vydańnie «Nastojaŝieje vriemia».
Alaksandr — kamandzir ekipaža Bradley, vajskoviec 47-j bryhady USU. Skryn videa
Ab ukrainskim ekipažy Bradley raspaviali nie tolki va ŭkrainskich navinach, ale i ŭ rasijskich pablikach. I praź niekatory čas Alaksandru patelefanavali ź nieviadomaha numara. Hołas u trubcy vymaviŭ: «Ja tvoj baćka». Spačatku Alaksandr padumaŭ, što heta žart, ale potym zrazumieŭ, što nie. Baćka prapanavaŭ pierajści na rasijski bok.
Baćka Alaksandra vajavaŭ tankistam na baku rasijskaha vojska na tym ža napramku. Pa słovach bajca USU, baćka kinuŭ jaho z maci, kali jon byŭ zusim maleńkim: «Mama — ukrainka, a jon z Rasii. Va Ukrainie jon byccam byŭ, ja mała pra jaho viedaju».
Alaksandru z baćkam daviałosia sustrecca ŭ adnym bai. Ukrainiec byŭ z ekipažam na zadańni, kali na ich niečakana vyskačyŭ rasijski tank: «Vyjechaŭ tank i streliŭ u bok. Brania vytrymała. Adrazu patelefanavaŭ baćka».
Akazałasia, što ŭ tym rasijskim tanku byŭ jon. Baćka patelefanavaŭ synu i skazaŭ, što pierastaŭ stralać, kali zrazumieŭ, chto ŭ ekipažy Bradley. Alaksandr jamu nie pavieryŭ: «My kali na adkacie byli, pa nam usio roŭna pracavali dalej. Baćkoŭskaha tam nie było. Tam była vyhada. Hrošy! Hrošy! Hrošy!»
Praź niekatory čas Alaksandr daviedaŭsia, što jaho baćka zahinuŭ.
«Jon vyjechaŭ, try razy na minie padarvaŭsia i ŭžo pačaŭ hareć. Ekipaž nie ŭvieś vybieh. Pa chodu, jon nie zmoh vyleźci i tam i zastaŭsia. U kožnaha svoj los. Ja dobra jaho nie viedaŭ, asabliva jaho nie bačyŭ. Dla mianie heta nie było, što kštałtu baćka, što kštałtu škada. Heta maja praca. Jon abraŭ svoj bok. I ŭsio».
Čytajcie taksama:
«Kapitulacyja — heta nie mir». Hienieralny sakratar NATA zaklikaŭ praciahvać dapamahać Ukrainie
Orban raspavioŭ, jak Tramp choča spynić vajnu va Ukrainie
Jakija nasielenyja punkty Rasija pasprabuje zachapić paśla Aŭdziejeŭki?
