Što stała z hierojami kultavaha biełaruskaha filma «Vyšej za nieba»
Film «Vyšej za nieba» zastajecca adnoj z najlepšych mastackich stužak, źniatych za časami niezaležnaści. Źniaty pa prahramie baraćby ź VIČ, jon vychodzić za hetyja vuzkija ramki, biez prykras adlustroŭvajučy biełaruskuju rečaisnaść pačatku 2010-ch hadoŭ. Pahladzieli, čym praź dziesiacihodździ zajmajucca akciory.
Leanid Paškoŭski i Alesia Hrybok
Siužet filma razhortvajecca vakoł 20-hadovaha studenta i muzyki Mikity Mickieviča, jaki pačynaje stasunki z dačkoj dekana Janaj. Ale ŭsio žyćcio chłopca razburaje styhmatyzavany dyjahnaz VIČ i roznahałośsi na tvorčaj arenie. Mikita skočvajecca ŭ jamu, ź jakoj jaho litaralna vykidajuć pad nohi adnahrupnicy Voli. Chłopiec sprabuje skarystacca hetym šancam, ale na šlachu jašče niamała pieraškod.
Leanid Paškoŭski
Leanid Paškoŭski ŭ roli Mikity. Kadr ź filma
Hałoŭnuju rolu ŭ filmie vykanaŭ Leanid Paškoŭski. Dla 25-hadovaha chłopca, jaki tolki skončyŭ ekanamičny ŭniviersitet, hetaja rola ŭ kiniematohrafie stała adzinaj, ale z ekranaŭ jon nie źnik. Paškoŭski naradziŭsia ŭ 1987 hodzie ŭ Žłobinie, što adnosiŭsia da terytoryj, jakija paciarpieli ad Čarnobylskaj katastrofy, i praz heta jaho časta pa prahramach dapamohi adpraŭlali na azdaraŭleńnie ŭ Italiju, Ispaniju i Hiermaniju. Vidać, hetyja pajezdki paŭpłyvali na jaho luboŭ da vandrovak.
Lonia Paškoŭski ŭ adnoj sa svaich vandrovak. Fota: 34mag
U 2017 hodzie Leanid Paškoŭski zavioŭ jutub-kanał «Chaču dadomu», u jakim raspaviadaje pra svaje padarožny ŭ samyja niebiaśpiečnyja miaściny Azii, Afryki i Paŭdniovaj Amieryki. U chutkim časie, u kancy 2018 hoda, Leanida pryznali najlepšym treveł-błohieram pavodle viersii čytačoŭ časopisa National Geographic Traveler. Siońnia na jahony kanał padpisany 1,33 młn hledačoŭ, a roliki pra miascovyja tradycyi roznych rehijonaŭ, tamtejšaje haradskoje žyćcio, truščoby, kryminał i ježu nabirajuć sotni tysiač, a časam navat miljony prahladaŭ.
Paškoŭski byŭ u Kabule pierad samym jaho padzieńniem
Leanid Paškoŭski nie zabyvaje pra radzimu. U 2020 hodzie jon padtrymaŭ pamknieńnie biełarusaŭ dasiahnuć mirnych pieramien.
«My, u adroźnieńnie ad prezidenta, usie hetyja hady raźvivalisia, raśli, razumnieli i hatovyja stać hramadzianami prahresiŭnaha i spraviadlivaha hramadstva, a nie maleńkaj, biednaj afrykanskaj dyktatury pasiarod Jeŭropy», — vykazvaŭsia ŭ instahramie błohier.
U 2022 hodzie jon taksama asudziŭ rasijskuju ahresiju, pryśviaciŭšy vyžyvańniu ŭkraincaŭ va ŭmovach vajny niekalki svaich videa.
Alesia Hrybok
Alesia Hrybok u roli Jany. Kadr ź filma
Alesia Hrybok, jakaja syhrała ŭ filmie pieršuju kachanku Mikity Janu, pajšła pa akciorskim šlachu, jak i mnohija, ihrajučy epizadyčnyja roli ŭ rasijskich sieryjałach. Adno ź niešmatlikich vyklučeńniaŭ — biełaruski kanśpirałahična-prapahandyscki film «Kod Kaina», źniaty pa dziaržaŭnym zakazie.
Siońnia Hrybok kastynh-dyrektarka. Jašče ŭ 2015 hodzie ŭ jaje vyjšła kniha «Mieniedžmient kinaakciora», jakaja ŭ 2022 hodzie źviedała treciaje vydańnie. U 2021 hodzie Hrybok stała aŭtarkaj vučebnaj prahramy pa śpiecyjalnaści «talent-mieniedžar akciora» dla rasijskaj Vyšejšaj škoły ekanomiki.
Apošnim časam biełaruskaja aktrysa vyjšła ŭ sacsietki. Chutčej za ŭsio, kali vy karystajeciesia tyktokam, to ŭžo traplali na jejnyja roliki. U vielmi jakasna źniatych videa aktorka raspaviadaje pra toje, jak prachodzić kastynhi i jakija typažy cikaviać ludziej, što adkazvajuć za padbory akcioraŭ. Kožny rolik Hrybok zalataje na sotni tysiač prahladaŭ. Taksama aktrysa maje 707 tysiač padpisčykaŭ na jutubie i 204 tysiačy padpisčykaŭ u instahramie.
Aksana Čyvialova
Aksana Čyvialova ŭ roli Voli. Kadr ź filma
Kinošnaja supiernica Jany — Vola, druhaja dziaŭčyna Mikity (u žyćci Aksana Čyvialova) — taksama praciahnuła akciorskuju karjeru ŭ rasijskich sieryjałach. Ale biełarusam jana viadomaja pa inšaj dziejnaści. Aksana ahučvała dyśniejeŭskija i inšyja filmy dla VOKA. Jaje hołas možna pačuć u biełaruskaj ahučcy «Papiałuški», «Ratatuja», «Karparacyi monstraŭ», «Hałavałomki» i «Viedźminaj dastaŭki» Chajaa Mijadzaki.
Alaksiej Jaravienka
Alaksiej Jaravienka ŭ roli Stasa. Kadr ź filma
Tvorčy supiernik Mikity — Stas, jaki pramianiaŭ ichni biełaruski hurt na papsu i pośpiech u Rasii, u žyćci vybraŭ zusim inšy šlach. Alaksiej Jaravienka, jaki syhraŭ Stasa, šmat hadoŭ zdymajecca ŭ sieryjałach i vystupaje z ułasnym bluz-bendam va Ukrainie, dzie ŭ 2014 hodzie ažaniŭsia z ukrainkaj Volhaj Karpavaj. U čas rasijskaha ŭvarvańnia ŭ instahramie zapisaŭ videzvaroty da biełarusaŭ i rasiejcaŭ, źbiraŭ hrošy na ryštunak dla ŭkrainskich vajaroŭ. Siońnia Alaksiej nabiraje na svoj kurs «akciorskaha majsterstva».
Vinsent
Repier Vinsent u filmie. Kadr ź filma
Siarod usich epizadyčnych rolaŭ, a ŭ filmie adznačyłasia davoli šmat biełaruskich dziejačaŭ, najbolš značnymi źjaŭlajucca dźvie. Pa-pieršaje heta Źmicier Papko, jon ža repier Vinsent, jaki ŭ filmie hraje amal samoha siabie — adnaho z muzykaŭ u hurcie. Rola niešmatsłoŭnaja, ale zadaje biełaruski viektar raźvićciu siužeta. U 2010-ja hady biełaruskamoŭny repier zdymaŭsia ŭ kino i vypuskaŭ albomy, ale apošnija hady źnik sa sceny. Jon žyvie i pracuje ŭ Varšavie. Zajmajecca aŭdyjapradakšanam: piša bity na Zachad, ahučvaje kinastužki, piša džynhły dla tele- i radyjopieradač.
Pry kancy 2023 hoda śpiavak viarnuŭsia da muzyki i vypuściŭ kranalnuju pieśniu «Nie zaŭždy» pra viartańnie dadomu. U klipie źnialisia zornyja kupałaŭcy Zoja Biełachvościk, Aleh Harbuz, Valancina Harcujeva.
Jaŭhien Bułka
Jaŭhien Bułka ŭ filmie. Kadr ź filma
Druhaja — rola Jaŭhiena Bułki, jaki taksama ŭ filmie źviazany z hurtam Mikity. U 2020 hodzie viadučy Jaŭhien Bułka padtrymaŭ pratesny ruch, z-za čaho straciŭ pracu i źnik ź biełaruskaj miedyjaśfiery. U mai 2023 hoda jon z žonkaj i dziećmi źjechaŭ u Izrail, dzie aktyŭna vyvučaŭ iŭryt. Ale ŭ chutkim časie daviałosia biehčy i adtul. 7 kastryčnika pačaŭsia napad CHAMAS na paŭdniovyja rajony Izraila. Jaŭhien z žonkaj Majaj i synam Lavonam vyjechali ŭ Hruziju, a paśla ŭ AAE.
Inšyja piersanažy
Viktar Rybčynski, jaki syhraŭ baćku Mikity, namieśnika načalnika RUUS, niadaŭna adznačyŭsia rollu ŭ prapahandysckim biełaruskim filmie «Na inšym bierazie». Taćciana Baŭkałava, jakaja syhrała maci Mikity, praciahnuła pracu ŭ Ruskim teatry imia Horkaha, pieryjadyčna zdymajučysia ŭ rasijskich sieryjałach. Inšyja druharadnyja piersanažy taksama ničym asablivym nie adznačylisia.
Tamara Mironava ŭ filmie. Kadr ź filma
Chiba što Tamara Mironava i Volha Niafiodava, jakija vykanali epizadyčnyja roli ŭ filmie, adznačylisia ŭ 2020 hodzie tym, što demanstratyŭna nie padtrymali bolšaści svaich kaleh pa Kupałaŭskim teatry, jakija syšli ŭ žniŭni z teatra na znak pratestu suprać falsifikacyi prezidenckich vybaraŭ, žorstkaha razhonu pratestoŭcaŭ i katavańniaŭ zatrymanych. Ciapier abiedźvie vierchavodziać u razhromlenym teatry i hastralujuć pa ałkakramach.
«Naša Niva» — bastyjon biełaruščyny
PADTRYMAĆČytajcie taksama:
