Kiroŭcy ad adčaju stali sihnalić. Što adbyvajecca na biełaruska-polskaj miažy VIDEA
Śviaty surjozna paŭpłyvali na abstanoŭku ŭ adzinym adkrytym punkcie propusku na miažy Biełarusi i Polščy. U Terespali, z polskaha boku, sabrałasia vializnaja čarha aŭtobusaŭ i lehkavych aŭtamabilaŭ, jakija nakiroŭvajucca ŭ Biełaruś. Dla kahości pakuty ŭžo skončylisia. 40 hadzin — stolki spatrebiłasia ŭ hetyja dni, kab pierasiekčy miažu, piša Onlíner sa spasyłkaju na čytača.
40 hadzin u čarzie — heta maleńkaje žyćcio sa svaimi bytavymi pytańniami.
— Ludzi, jakija stajać ad koła da KPP (kala 2,3 km), z kanca čarhi chadzili ŭ pačatak, kab kupić pačak cyharet. Tamaka deficyt usiaho: niama ni ježy, ni vady, ni paliva. Na praciahu ŭsioj darohi ad koła da KPP na płatach kamunalniki raźviesili miaški dla śmiećcia.
Čarha ŭ prybiralniu ŭ Centrum Handlowe składałasia z 70-80 dziaŭčat, — raspaviadaje surazmoŭca.
Čamu mienavita dziaŭčat? Mužčyny ŭnikajuć pytańnia.
U niejki momant niervy stali zdavać. I vadzicieli, jakim jašče treba było prachodzić kantrol, pačali adčajna sihnalić.
— Narod takim čynam prosta vykazvaŭ pratest suprać taho, što adbyvajecca, jak prapuskajuć ci, dakładniej, nie prapuskajuć transpart.
— I jakoj była reakcyja?
— Nu, pacichu pačali zapuskać. Vielmi nieachvotna, z krykami. Naohuł, na polskim baku chadziŭ tolki adzin čałaviek, praviaraŭ transpart. Na ŭjeździe na most byŭ jašče adzin pamiežnik, jaki rehulavaŭ ruch. Pry ŭjeździe ŭ punkt propusku zapuskali aŭtobusy, zabivali imi ŭsie kalidory, a vypuskać na most nie śpiašalisia. Ludzi skardzilisia, im adkazvali adno i toje ž, maŭlaŭ, telefanujcie ŭ ministerstva, a ŭ nas meta — prapuskać aŭtobusy. Kamuści na polskaj haračaj linii ŭvohule zajavili, maŭlaŭ, na Kalady ŭ ich budzie pracavać tolki adzin kanał dla propusku, — praciahvaje čytač.
Heta nie značyć, što ŭ tych, chto jechaŭ u aŭtobusach, realnaść była praściejšaj.
— U 12 hadzin dnia 24 śniežnia na miažy było kala 50 aŭtobusaŭ, jakija jechali z Polščy ŭ Biełaruś.
Ludzi pierachodzili ŭ inšyja aŭtobusy, kab prosta chutčej apynucca doma: za padsadku, ja čuŭ, ź ich prasili ad 10 da 400 dalaraŭ, i heta ad KPP da Bresta, — adznačaje surazmoŭca.
Prajšoŭšy ŭsie apisanyja pakuty, čytač taki dabraŭsia da punkta propusku «Brest» na biełaruskim baku.
Za śpinaj zastavałasia čarha i polskaje kafe kala KPP, dzie na toj momant u prodažy było tolki niekalki butelek vady i piečyva.
— Kali nie ličyć stajańni ŭ čarzie, a kazać tolki pra samo prachodžańnie kantrolu, to na polskim baku jon zaniaŭ niedzie 2 hadziny, na biełaruskim (z ulikam zialonaha kalidora) — 15—20 chvilin. Uvohule, vielmi ščaślivy, što doma, ź siamjoj. A tym, chto jašče ŭ čarzie, raju zapasacca vadoj, ježaj, zapraŭlać poŭnyja baki, brać z saboj ciopłyja rečy i nabiracca ciarpieńnia, — padsumavaŭ surazmoŭca.
Čytajcie taksama:
Na miažy zatrymali žychara Bresta, jaki viarnuŭsia z Polščy
«Napeŭna, usio prapłačana». Dalnabojniki stajać na polska-biełaruskaj miažy bolš za tydzień