Chorary, ekśpierymienty i šmat karotkaha mietra: najlepšaje biełaruskaje kino hoda pakažuć na vialikim ekranie
Kinafiestyval «Listapad» byŭ admienieny za dzień da adkryćcia, ale jaho arhanizatary pakazvajuć filmy konkursnych i pazakonkursnych prahram tak ci inakš — asobnymi karcinami albo ich sieryjami. 17 śniežnia ŭ kinateatry Silver Screen Galileo raspačniecca fiestyval biełaruskich filmaŭ — uvieś ćviet našaha kino za apošni hod, što skłaŭ sioletni Nacyjanalny konkurs «Listapada».
Heta dvanaccać stužak plus dva tvorčyja viečary kiniematahrafistaŭ, što zahinuli ŭ aŭtakatastrofie 14 traŭnia. Nacyjanalny konkurs sioleta choć i nie «tryumfalny», ale ž cikavy.
U prahramu ŭvajšoŭ poŭny mietr «Zabaronienaja zona» Mitryja Siamionava-Alejnikava. U svoj čas Ministerstva kultury prafinansavała hety pryvatny kinaprajekt, zdavałasia b, z-za važnaści temy, ale jak takich refleksij ab Čarnobylskaj trahiedyi tut niama — režysior zaprasiŭ paznavalnych rasijskich akcioraŭ i zrabiŭ chorar, u jakim usio pačynajecca ź viasiołaj tusoŭki, a ŭ žyvych zastajecca adzin čałaviek.
Zatoje tema Čarnobyla vydatna ŭvasobiłasia ŭ to śmiešnaj, to sumnaj dakumientalnaj karcinie «Nieviadomy raj» Darji Jurkievič pra tak zvanuju zonu adsialeńnia. Dakumientalistka Nastaśsia Mirašničenka — letaś jaje «Debiut» vysoŭvaŭsia ad Biełarusi na «Oskar» — uvajšła ŭ konkurs ź filmam «Ciemra zvonku» pra futbolnuju kamandu nieviduščych i jaje treniera.
Aleś Łapo — ź miłaj karotkamietražkaj pra dyrektara sielskaha Doma kultury, jaki zadumaŭ arhanizavać kampjutarnyja kursy dla piensijanieraŭ. Asobna možna zhadać ekśpierymientalny daku-chorar Mikity Łaŭreckaha «Mikita Łaŭrecki», zmantavany z chatniaha videa, jakoje fiksuje režysiora va ŭzroście ad 0 da 16 hadoŭ.
Sieryja pakazaŭ taksama ŭklučaje ŭ siabie kino Andreja Kuciły, Viktara Aśluka, Dzimy Dziadka dy inšych. Viečary 17 i 23 buduć pryśviečany zahinułym Lubie Ziamcovaj, Maksimu Haŭrylenku i Uładzimiru Michajłoŭskamu.
Fiestyval pačniecca jakraz u Dzień biełaruskaha kino i praciahniecca da 22 śniežnia.
