Advakat Babaryki: Nijakich prapanoŭ ab vyzvaleńni ź SIZA KDB jamu nie pastupała
Fota Nadziei Bužan
Prapanoŭ ab vyzvaleńni ź SIZA KDB pad jakija-niebudź umovy Viktaru Babaryku nie pastupała. Pra heta Tut.by raspavioŭ advakat eks-pretendenta ŭ prezidenty Dźmitryj Łajeŭski.
Advakat Dźmitryj Łajeŭski paćvierdziŭ, što Viktar Babaryka pa-raniejšamu znachodzicca pad vartaj. Raniej dačka Viktara Babaryki Maryja paviedamiła Tut.by, što pa spravie Viktara, «na žal, niama nijakich navin». Tak jana adkazała na prośbu paćvierdzić vyzvaleńnie baćki.
— Viktar Dźmitryjevič znachodzicca ŭ SIZA KDB, nijakich prapanoŭ ab vyzvaleńni jamu nie pastupała. Chadajnictvy i skarhi ab źmienie miery strymańnia adchilenyja. Pra niepryznańnie Viktaram Dźmitryjevičam viny paviedamiła KDB na svaim sajcie — u hetym dačynieńni ničoha nie źmianiłasia. Zaraz my razam ź Viktaram Dźmitryjevičam znajomimsia z materyjałami spravy. I praciahvajem nastojvać na nievinavataści, — raspavioŭ Łajeŭski.
Nahadajem, člen prezidyuma Kaardynacyjnaj rady Pavieł Łatuška ŭ intervju tielehram-kanału zajaviŭ, što, pa jaho źviestkach, pytańnie ab vyzvaleńni eks-kiraŭnika Biełhazprambanka i eks-pretendenta ŭ prezidenty Viktara Babaryki ŭzdymałasia na sustrečy kiraŭnika MZS Rasii Siarhieja Łaŭrova i Alaksandra Łukašenki.
— Prajšła infarmacyja, što Viktar Dźmitryjevič ŭžo znachodzicca na voli. Jana nie paćvierdziłasia pa roznych kanałach, choć chto jaho viedaje. Mahčyma, u bližejšy čas jana paćvierdzicca, tamu što ciapier Łukašenka nibyta adstojvaje pazicyju, pavodle našych insajdaŭ, ab tym, kab Viktar Dźmitryjevič pajechaŭ na Kipr razam sa svaim synam. I heta budzie ŭmovaj vyzvaleńnia. Ale, ja dumaju, vielmi mnohaje zaležyć ad pazicyi Viktara Dźmitryjeviča, — zajaviŭ tady Łatuška.
