Raskazvajem, chto taki žurnalist Ihar Iljaš, jakoha adpravili na 15 sutak, pakul žonka siadzić u SIZA
24 listapada ŭviečary źnik žurnalist Ihar Iljaš, pa miescy jaho žycharstva brat znajšoŭ tolki pratakoł kanfiskacyi kampjutara i telefona. Potym Ihara znajšli na Akreścina, praź dzień jaho asudzili na 15 sutak aryštu.
Iljaš — heta muž žurnalistki «Biełsata» Kaciaryny Andrejevaj, jakaja ciapier znachodzicca ŭ žodzinskaj turmie pa kryminalnym artykule.
«Naša Niva» parazmaŭlała z bratam žurnalista Vadzimam Iljašom pra jaho dziacinstva, zachapleńni i pracu.
Ihar Iljaš. Fota z fejsbuka.
«Ihar naradziŭsia ŭ 1988 hodzie ŭ Minsku, ja starejšy za jaho na siem hadoŭ, u nas jość jašče starejšaja siastra. Dziacinstva naša prajšło na vulicy Anharskaj.
Naš tata ŭsio žyćcio adpracavaŭ na zavodzie MAZ, jon pamior u minułym hodzie. Zasłužany rabotnik MAZa, jon pracavaŭ u biuro, jakoje zajmajecca harantyjnym absłuhoŭvańniem. U saviecki čas jeździŭ pa ŭsich respublikach. Chacia jon daŭno byŭ piensijnaha ŭzrostu, ź im uvieś čas praciahvali kantrakt. Kali zdaryłasia niaščaście, to pryjechała šmat vielmi ludziej. Mama — miedrabotnik, jana ciapier na piensii.
Ihara ź dziacinstva adroźnivała toje, što jon byŭ schilny da analizu, nikoli nie byŭ sarvihałavoj. Jon niešmatsłoŭny, vielmi strymany. Brat ad samaha rańniaha dziacinstva šmat čytaŭ, u jaho vydatny muzyčny hust, litaraturny, jak u paezii, hetak i ŭ prozie. Jahonymi aryjencirami byli Brodski, Daŭłataŭ, z muzyki — The Beatles.
Dastatkova rana jon zrazumieŭ, što maje cikavaść da pracy sa słovam. Ihar zakančvaŭ biełaruskuju fiłałohiju BDU. Jon abraŭ dla siabie šlach žurnalista i zrazumieŭ, u jakoj temie choča raźvivacca. Heta nie spartyŭnaja žurnalistyka, nie śvieckaja chronika. U jaho vialikaja ciaha da historyi, jon dla siabie vyznačyŭ, što choča być palityčnym ahladalnikam.
Pačynaŭ pracavać u vydańni «Biełarusy i rynak», potym pracavaŭ u minskim ofisie radyjo «Svaboda», a ad 2017 hoda razam z Kaciarynaj jany pierašli na «Biełsat».
U ich siamji jość dakładnaje raźmiežavańnie śfier. Kali Kacia — žurnalist ź miescaŭ padziej, joj padabajecca žyvy efir, adčuvańnie ŭsiaho tut i ciapier, to Ihar bolš schilny da analizu, prahnozu. U hetym płanie jany vielmi dobra adno adnaho dadajuć, unutry ich siamja ściakajecca infarmacyja z roznych krynic.
Paśla pačatku kanfliktu na uschodzie Ukrainie Ihar vielmi zacikaviŭsia temaj udziełu biełarusaŭ u hetaj vajnie, pryčym z roznych bakoŭ — i «DNR», i Ukrainy. Razam z Kaciaj jany doŭha prapracoŭvali temu, ja dumaju, što ŭ našaj krainie jany adzinyja śpiecyjalisty tut. Vynikam ich pracy stała kniha «Biełaruski Danbas», dzie padrabiazna apaviadajecca pra ŭdzieł biełarusaŭ i Biełarusi ŭ kanflikcie. Jany vielmi hanaracca vynikam svajoj pracy. Pieršaja kniha vyjšła hetym letam, ale ŭ ich užo byli prapanovy na druhuju knihu. Nakolki ja viedaju, zbor infarmacyi jany ŭžo pačali.
Na sudzie nad Iharam ja maksimalna sprabavaŭ zaniać niejtralnuju pazicyju i słuchać abodva baki. Ale z ulikam majho žyćciovaha dośviedu, viedaŭ, łohiki i zdarovaha sensu pazicyja Ihara i jaho advakata vyhladali pierakanaŭča. Pazicyja ž abvinavačańnia była nadumanaj. Ciažkaje ŭražańnie heta ŭsio pakinuła, adčuvańnie poŭnaj biezabaronnaści.
Pahavaryć z samim Iharam nam nie atrymałasia. Na siońnia ja sprabavaŭ zrabić pieradaču ŭ IČU na Akreścina, zaniaŭ čarhu a šostaj ranku, ale ŭ śpisach jaho nie było.
Potym ja abzvaniŭ Baranavičy, Žodzina, Mahiloŭ, ale na ciapierašni momant nidzie jaho niama.
Jany sprabujuć uskładnić i tak nie samaje pryjemnaje čakańnie», — raskazaŭ Vadzim.
Ihar Iljaš i Kaciaryna Andrejeva. Fota z fejsbuka.
Niezadoŭha da aryštu pra svoj šlub z Andrejevaj Ihar raskazvaŭ nastupnaje: «My paznajomilisia ŭ 2015 hodzie. Ja nie tak daŭno byŭ žurnalistam «Radyjo Svaboda», a Kacia ŭvohule tolki pačynała šlach u žurnalistycy, pryjšła supracoŭničać z redakcyjaj. Joj była vielmi cikavaja tema ŭdziełu biełarusaŭ u vajnie na ŭschodzie Ukrainy, mnie taksama. My abjadnoŭvali namahańni, pracavali razam, tak i zakachalisia adno ŭ adnaho. A trochu bolš čym praz hod paśla znajomstva zhulali viasielle», — kazaŭ Ihar.
Hladzi taksama: Chto takaja žurnalistka Kaciaryna Andrejeva? Raskazvajuć jaje muž i dziadula
