U Janavie sudzili nastaŭnicu za prahułku z BČB-parasonam. Śviedkam byŭ jaje były vučań
Školnaja nastaŭnica ź Janava Alena Pucykovič atrymała 1485 rubloŭ štrafu za prahułku pa horadzie ź bieł-čyrvonym parasonam. Adnym sa śviedkaŭ na sudzie byŭ supracoŭnik milicyi, u jakoha ŭ svoj čas Alena Mikałajeŭna vykładała, piša Tut.by.
Alena Mikałajeŭna (u pieršym šerahu druhaja źleva) na sudzie. Fota: «Pieršy Rehijon»
Alena Mikałajeŭna Pucykovič — vykładčyk z amal 30-hadovym piedahahičnym stažam. U ivanaŭskaj škole jana vykładaje ruskuju movu i litaraturu. Raniej u sudach nastaŭnica nie była, zatoje sa žniŭnia jaje vyklikali ŭžo trojčy. Za ŭdzieł u niesankcyjanavanych mierapryjemstvach i niepadparadkavańnie supracoŭnikam milicyi joj užo dali štrafaŭ na 100 bazavych vieličyń (2700 rubloŭ).
Apošni raz Alenu Mikałajeŭnu sudzili 11 listapada. Padstavaj dla raźbiralnictva staŭ špacyr pa Janavie ŭ niadzielu 25 kastryčnika. U toj dzień kala 20 žycharak rajcentra prajšli pa vulicy Savieckaj. U dvuch ź ich u rukach byli bieł-čyrvonyja parasony, u adnoj — tolki čyrvony.
Paźniej na niekatorych udzielnic prahułki skłali pratakoły. Alenie Mikałajeŭnie — za zakliki i ŭdzieł u niesankcyjanavanym mierapryjemstvie, a taksama niepadparadkavańnie patrabavańniu supracoŭnika milicyi.
11 listapada spravu nastaŭnicy razhledzieli ŭ sudzie.
Śviedkam na sudzie vystupaŭ staršy inśpiektar Janaŭskaha RAUS. U svoj čas Alena Mikałajeŭna vykładała jamu ruskuju movu i litaraturu. Sud pryznaŭ Alenu Mikałajeŭnu vinavataj i pryznačyŭ joj 55 bazavych vieličyń štrafu (1485 rubloŭ). Jašče adna ŭdzielnica prahułki, Maryna Kijaviec, atrymała 30 bazavych (810 rubloŭ).