Žurnalistcy, jakaja adbyła 15 sutak, dali jašče stolki ž
17 listapada ŭ śledčym izalatary №6 u Baranavičach asudzili na 15 sutak aryštu niezaležnuju žurnalistku i pravaabaroncu Marynu Kastylančanka. Jana ŭžo adbyvaje prysudžanyja joj raniej 15 sutak aryštu pa art. 23.34 i 23.4 KaAP. Takim čynam, pad aryštam jana ahułam praviadzie 30 sutak, paviedamlajuć pravaabaroncy.
Maryna Kastylančanka. Fota: Radyjo Svaboda.
Maryna Kastylančanka musiła vyjści na volu paśla 15-sutačnaha aryštu ŭ subotu 14 listapada ŭ 18:30. Ale praz paŭhadziny čakańnia pad ścienami SIZA da blizkich žurnalistki i jašče piaci čałaviek, zatrymanych ź joj 30 kastryčnika, vyjšli supracoŭniki milicyi i paviedamili, što jany znoŭ zatrymanyja ŭ miežach administracyjnaha pracesu i na volu siońnia nie vyjduć.
Za paŭhadziny da vyzvaleńnia na ich pryjšli raparty ad supracoŭnikaŭ HUBAZiKa ab tym, što jany nibyta 25 kastryčnika ŭdzielničali ŭ niesankcyjanavanym šeści ŭ Minsku.
U vyniku, sudździa Mikałaj Kmita na vyjaznym sudovym pasiadžeńni asudziŭ Marynu Kastylančanka jašče na 15 sutak aryštu.
Novyja sutki atrymali i inšyja zatrymanyja ź joj. Sud Baranavickaha rajona i h. Baranavič asudziŭ Maryju Šablinskuju i Natallu Sinkaviec na 10 sutak aryštu, a Uładzisłava Maščuka, Uładzimira Łaryjonava i Alaksandra Sinkaviec — na 15 sutak. Ich usich abvinavacili ŭ tym, što jany nibyta prymali ŭdzieł u niesankcyjanavanym Maršy na Partyzanskim praśpiekcie, 75 u kolkaści 20-30 čałaviek.
Viadoma, što na sudovych pracesach Natalli i Alaksandra Sinkaviec u izalatary prysutničaŭ supracoŭnik HUBAZiKa.