Źbitamu słuččaku prysudzili 3 hady kałonii za supraciŭ milicyjantu
spring96.org
Sud Słuckaha rajona asudziŭ 13 listapada 29-hadovaha Ramana Karanieviča na try hady kałonii za supraciŭ milicyjantu 10 žniŭnia pavodle č. 2 art. 363 Kryminalnaha kodeksa. Mienavita takoje pakarańnie prasiŭ pryznačyć chłopcu prakuror Alaksiej Krot. Prysud vynies sudździa Alaksandr Šutko. Paśla abviaščeńnia prysudu mamu Ramana zabrała chutkaja: joj stała kiepska, paviedamlaje spring96.org.
Ramana Karanieviča zatrymali 10 žniŭnia ŭ Słucku. Paśla zatrymańnia chłopiec apynuŭsia ŭ špitali z traŭmavanym chrybietnikam. Paciarpieły milicyjant Ivan Hančarevič śćviardžaje, što pry zatrymańni Raman udaryŭ jaho kamieniem pa hałavie i ŭ jaho pajšła kroŭ. Raman śćviardžaje, što kinuŭ kamień i nie bačyŭ navat kudy.
Raman Karanievič u apošnim słovie skazaŭ:
«Ja b pryznaŭ svaju vinu tolki ŭ tym, što, tak, mahčyma, ja ŭciakaŭ. Moža być, mnie nie varta było ŭciakać. Ale ja spałochaŭsia. Ja nie chacieŭ kanfliktu. Ja išoŭ dadomu da dziaciej. Mnie nie patrebnyja byli razborki, ja pajšoŭ ad ich. Ja ŭbačyŭ natoŭp ludziej i syšoŭ dadomu. U tym, što adbyłosia ŭ dalejšym, ja siabie vinavatym nie liču. Ja nie biŭ supracoŭnika, ja, naadvarot, sprabavaŭ ad jaho ŭciačy. Ja prašu apraŭdać mianie».
