«Kolki ty jašče chadzić budzieš»: u Homieli sudzili 73-hadovuju piensijanierku
Sud Centralnaha rajona Homiela 9 listapada razhladaŭ spravu 73-hadovaj Jevy Ramanaŭny Bykoŭskaj. Pa viersii milicyi, jana ŭdzielničała ŭ niesankcyjanavanym šeści, piša Radyjo Svaboda.
25 kastryčnika ŭ Homieli anansavałasia akcyja pratestu. U pryznačany čas u centry horada sabrałasia niekalki dziasiatkaŭ čałaviek. Jany nie trymali ni ściahoŭ, ni płakataŭ. Tym nie mienš, milicyja i AMAP pačali zatrymlivać ludziej. Zatrymali i 73-hadovuju piensijanierku Jevu Bykoŭskuju, byłuju nastaŭnicu.
Supracoŭniki AMAP, pa śviedčańni Jevy Ramanaŭny, vielmi hruba abychodzilisia ź joj.
«Łajalisia i matam, i abražali ŭsialak, kryčali: «S*ka, kolki ty jašče budzieš chadzić?!». Adzin amapaviec kryčaŭ: «U jaje tata — palicaj!». Heta nadta kryŭdna, bo moj tata vajavaŭ suprać nacystaŭ i dajšoŭ da Bierlina. Ja była vymušanaja potym źviarnucca da psichołaha, u maim žyćci sa mnoj nichto tak nie abychodziŭsia!» — raspaviała piensijanierka.
U jaje zabrali mabilny telefon — i dahetul nie viarnuli.
Sudździa Siarhiej Karmanovič adpraviŭ spravu na dapracoŭku.