U Słonimie sudziać junaka, a ŭ Hrodnie — piensijaniera, jakija zastupilisia za žančyn na akcyjach i stali fihurantami kryminalnych spraŭ
U Słonimie sudziać junaka, a ŭ Hrodnie — piensijaniera, jakija zastupilisia za žančyn na akcyjach i zatym stali fihurantami kryminalnych spraŭ za hvałt u dačynieńni da milicyjantaŭ (art. 364 KK RB).
U sudzie Słonimskaha rajona idzie razhlad kryminalnaj spravy suprać Maksima Kučynskaha. Jon byŭ zatrymany 9 žniŭnia ŭ Słonimie na mirnaj akcyi pratestu, kali zastupiŭsia za dziaŭčynu ź bieł-čyrvona-biełym ściaham, jakuju pry razhonie mitynhu źbivali siłaviki. Chłopca aryštavali na 7 sutak, a zatym zaviali suprać jaho kryminalnuju spravu — za toje, što ŭpaŭ na milicyjanta i nadarvaŭ jamu kašulu.
Na sudzie paciarpieły milicyjant prosić spahnać z Kučynskaha 1000 rubloŭ materyjalnaj škody, a prakuror — pakarać chłopca 2 hadami «chatniaj chimii».
U Hrodnie pačaŭsia sud pa kryminalnaj spravie Juzafa Niamiery. 63-hadovaha mužčynu vinavaciać adrazu pa dvuch artykułach kryminalnaha kodeksa — 342 (Arhanizacyja abo aktyŭny ŭdzieł u hrupavych dziejańniach, jakija hruba parušajuć hramadski paradak) i 364 (Hvałt albo pahroza prymianieńnia hvałtu ŭ dačynieńni da milicyjanta). Juzaf Niamiera ŭdzielničaŭ u akcyi pratestu 6 vieraśnia i baraniŭ žančynu ad AMAPa. Pry tym jon šturchanuŭ adnaho ź milicyjantaŭ, što i stała pryčynaj pačatku kryminalnaj spravy.
Na pracesie paciarpiełaha milicyjanta pasadzili za admysłovuju šyrmu, kab nichto nie moh bačyć jaho tvar.