Łaŭroŭ: Abviaščeńnie Cichanoŭskaj u vyšuk — čysta pravavoje pytańnie
— U Biełarusi pakul niama nijakich prykmiet, jakija pakazvajuć na toje, što Alaksandr Łukašenka maje namier pravodzić realnuju, a nie butaforskuju reformu Kanstytucyi i daterminovyja prezidenckija vybary. Miž tym rasijskija ŭłady pa-raniejšamu admaŭlajucca ad kantaktaŭ z apazicyjaj i navat abviaścili kandydata ŭ prezidenty na vybarach-2020 Śviatłanu Cichanoŭskuju ŭ vyšuk. Ci nie aścierahajeciesia vy, što ŭ doŭhaterminovaj pierśpiektyvie Rasija pastaviła nie na taho? Bo ŭ vypadku źmieny režymu ŭ Biełarusi Rasija moža sutyknucca z katastrafičnaj strataj upłyvu, — zapytaŭsia «Kommiersant» u kiraŭnika MZS Rasii Siarhieja Łaŭrova.
— Nie mahu pahadzicca z takoj pastanoŭkaj pytańnia — va ŭsich jaho častkach, — adkazaŭ Łaŭroŭ.
— Pierš za ŭsio, toje, u jakim abjomie pavinna być praviedzienaja kanstytucyjnaja reforma ŭ Biełarusi, vyrašać tolki biełaruskamu narodu. Kali padrychtavanyja prapanovy, zaćvierdžanyja Usiebiełaruskim narodnym schodam, buduć uchvalenyja padčas Usienarodnaha refierendumu, jaki, jak ja razumieju, płanujecca pravieści, značyć, tak i pavinna być. A ŭžo toje, nakolki ich hłybinia adpaviadaje čakańniam źniešnich naziralnikaŭ, heta sprava treciaja.
Što tyčycca ŭ cełym kanstytucyjnaj reformy, to, jak vy viedajecie, Rasija padtrymlivaje inicyjatyvu prezidenta Łukašenki. U tym liku i tamu, što tym samym stvarajecca vielmi zapatrabavanaja zaraz placoŭka dla ahulnanacyjanalnaha dyjałohu. Važna, što ŭłady krainy dekłarujuć imknieńnie ŭciahnuć u praces šyrokija płasty nasielnictva, arhanizavaŭšy zbor prapanoŭ hramadzian pa papraŭkach u Kanstytucyju. Ihnaravać taki padychod i mahčymaści, jakija jon adkryvaje, było b lehkadumna. Zrazumieła, u hetuju pracu nichto nie pavinien nijakim čynam umiešvacca — ni Rasija, ni inšyja krainy.
Abviaščeńnie ŭ vyšuk Śviatłany Cichanoŭskaj — heta čysta pravavoj pytańnie. Havorka idzie ab vykanańni Rasijaj svaich abaviazacielstvaŭ pa damovie dziaržaŭ-udzielnic SND ab miždziaržaŭnym vyšuku asob ad 10 śniežnia 2010 hoda.
Zhodna z artykułam 7 hetaha dakumienta, farmiravańnie i viadzieńnie centralizavanaha infarmacyjnaha masivu miždziaržaŭnaha vyšuku asob ažyćciaŭlaje Hałoŭny infarmacyjna-analityčny centr MUS Rasii ŭ ramkach miždziaržaŭnaha infarmacyjnaha banka. Śviatłanu Cichanoŭskuju dadali ŭ hety infarmacyjny bank na padstavie zapytu biełaruskaha boku.
I narešcie, ab tym, na kaho «stavić» Rasija ŭ Biełarusi. Na braterski nam biełaruski narod, na biełaruskuju dziaržavu, jakaja źjaŭlajecca našym sajuźnikam i stratehičnym partnioram. Kali narod Biełarusi zrabiŭ svoj vybar, my abaviazany i budziem jaho pavažać. Heta vyrazna paćvierdziŭ prezident Pucin u vinšavalnym pasłańni prezidentu Łukašenku ŭ suviazi ź jaho pieramohaj na vybarach, — adznačyŭ Łaŭroŭ.
