Baćki studentaŭ BDUIR pryhrazili pierastać płacić za vučobu
Baćki studentaŭ-płatnikaŭ BDUIR skłali kalektyŭny zvarot rektaru VNU Vadzimu Bohušu. Jany patrabujuć abaranić vykładčykaŭ univiersiteta i spynić pieraśledvać studentaŭ za ich pohlady. Jak raspavioŭ dev.by adzin z baćkoŭ, zvarot užo padpisali 130 čałaviek. Zbor podpisaŭ praciahvajecca.
U svaim zvarocie baćki kanstatujuć, što ŭ VNU pieraśledujuć studentaŭ i vykładčykaŭ za vykazvańnie hramadzianskaj pazicyi, adbyvajucca niezakonnyja zatrymańni nieviadomymi asobami ŭ maskach, zvalniajuć lepšych śpiecyjalistaŭ.
— Svaimi dziejańniami administracyja ŭniviersiteta nanosić niepapraŭnuju škodu adukacyjnamu pracesu, parušajučy ŭziatyja na siabie harantyi zabieśpiačeńnia adukacyi na vysokim uzroŭni, i tym samym chavaje prestyž navučalnaj ustanovy. My zaklikajem administracyju BDUIR ažyćciaŭlać svaje paŭnamoctvy stroha pavodle zakanadaŭstva Respubliki Biełaruś, — havorycca ŭ zvarocie.
Taksama baćki vyłučyli kiraŭnictvu VNU svaje patrabavańni:
— Abaranić vykładčykaŭ i zabiaśpiečyć umovy dla ich prafiesijnaj dziejnaści. Spynić zvalniać i pieraśledvać vykładčykaŭ, jakija adkryta vykazali svaju hramadzianskuju pazicyju, u tym liku tych, chto padpisaŭsia suprać adličeńnia studentaŭ.
— Padać śpisy vykładčykaŭ, jakija byli zvolnienyja z pačatku hoda i dać infarmacyju pra pryčyny zvalnieńnia.
— Spynić pieraśledvać studentaŭ za ich pohlady, jakija nie supadajuć z vašymi.
— Stvaryć biaśpiečnyja ŭmovy arhanizacyi adukacyjnaha pracesu, zabaraniŭšy znachodzicca na terytoryi ŭniviersiteta nieviadomym asobam.
U zvarocie zaznačajecca, što 15 listapada — nastupny termin apłaty za navučańnie, tamu baćki prosiać adkazać na ich zvarot piśmova da 13 listapada.
— Kali kiraŭnictva ŭniviersiteta nie zabiaśpiečvaje jakasnaha adukacyjnaha pracesu, to baćki jak płacielščyki ličać, što majuć prava nie apłačvać takija pasłuhi.
U vypadku admovy ŭ zadavalnieńni našych patrabavańniaŭ, my pakidajem za saboj prava damahacca inšymi zakonnymi mietadami i sposabami admieny niezakonnych zahadaŭ ab zvalnieńni vykładčykaŭ i adličeńni studentaŭ, a taksama nastojvać na źmienie kiraŭnictva BDUIR, — napisali baćki studentaŭ.
