Film pra nibyta viarboŭku padletkaŭ ukrainskimi śpiecsłužbami pakažuć va ŭsich navučalnych ustanovach Biełarusi
Film «Dzieci na prycele» pakažuć va ŭsich navučalnych ustanovach Biełarusi. Padrabiaznaściami ŭ efiry ANT padzialiłasia namieśnik ministra adukacyi Biełarusi Kaciaryna Piatruckaja.
«My siońnia sutykajemsia z tym, što «supracoŭniki ŭkrainskich śpiecsłužbaŭ samymi brudnymi, samymi podłymi sposabami manipulujuć našymi dziećmi, uciahvajučy ich u dyviersijnuju dziejnaść», — skazała jana.
Piatruckaja źviarnuła ŭvahu na toje, što ŭkazany film pakažuć nie tolki dzieciam — budzie prapanavana pahladzieć jaho piedahoham, a taksama baćkam.
Film pra aryšt padletkaŭ pakazali viečaram u paniadziełak u prajm-tajm na ANT.
Jak śćviardžaje prapahanda, padletki abjadnalisia, kab rabić dyviersii pa navodcy ŭ Biełarusi, a paśla i ŭ Rasii. Praŭda, adzinyja ich praviedzienyja akcyi, jakija zhadvajuć u filmie, — rasklejvańnie ŭlotak.
Hrupu sabrała dziaŭčynka-padletak z Ukrainy Maryja Misiuk. Jana z baćkami pierajechała ŭ Biełaruś paśla pačatku vajny ŭ 2022-m. Maryja vučyłasia ŭ mastackim kaledžy ŭ Miry. Prapahanda nazyvaje jaje kamandziram terarystyčnaj jačejki «Čornyja sałaŭi» i śćviardžaje, što za joj stajała SBU.
Jak śćviardžaje prapahanda, maładziony źbiralisia na baranavickaj kvatery, kab padrychtavacca da svajoj pieršaj surjoznaj akcyi — sabrać vybuchoŭku i ŭzarvać baranavickaje adździaleńnie milicyi ci prakuraturu.
Maryju Misiuk abvinavačvajuć pa č. 2 art. 289 (akt teraryzmu). Jakoje abvinavačańnie vystavili inšym padletkam, nie paviedamlajecca.
Čytajcie taksama:
Siłaviki zatrymali siemiarych padletkaŭ, jakich vinavaciać u teraryźmie i zdradzie dziaržavie
Ašukancy ŭzialisia za nastaŭnikaŭ: pišuć ad imia dyrektara i abvinavačvajuć u finansavańni teraryzmu
Palityčnyja represii ŭ Biełarusi vyjšli na płato, i jano budzie zachoŭvacca — sacyjołah Koršunaŭ
