Što my słuchali ŭ kastryčniku — dziesiać najcikaviejšych albomaŭ miesiaca AŬDYJA
Suśvietna viadomyja kalektyvy paradavali svaich prychilnikaŭ doŭhačakanymi relizami, nie abyšłosia biez navinak i ŭ ajčynnaj muzycy.
Groove Armada — Edge of the Horizon
Brytanskija elektronščyki vypuścili pieršy za 10 hadoŭ łonhpłej u toj čas, kali vialikija fiestyvali pastaŭlenyja na paŭzu.
Albom jakraz i zapisvaŭsia ŭ režymie samaizalacyi: muzykanty prosta zhubilisia siarod instrumientaŭ, sintezataraŭ i zapisaŭ.
Mumij Trołl — Prizraki Zavtra
Adzin z najbolš viadomych rasijskich hurtoŭ anansavaŭ na śniežań svoj čarhovy albom. Ale ŭ kastryčniku prezientavaŭ reliz-siurpryz, u jaki ŭvajšli vosiem trekaŭ, jakija kanceptualna nie padychodzili da śniežańskaha alboma.
Čamu siurpryz? Mahčyma, tamu, što Illa Łahucienka zaśpiavaŭ razam z papularnymi repierami T-Fest'am i Skryptanitam. Niebłahaja sproba paznajomić zumieraŭ z kłasikaj rasijskaj muzyki.
Róisín Murphy — Róisín Machine
Dziesiać hod tamu irłandskaja śpiavačka Rojšn Miorfi zachacieła zapisać albom z dyskatečna-kłubnymi trekami. Mienavita toj momant možna ličyć pačatkam stvareńnia alboma Róisín Machine, jaki pabačyŭ śviet tolki ciapier.
U «mašynie Rojšn» jašče šmat enierhii i bienzinu. Idealny saŭndtrek dla chatnich piatničnych viečarynak.
Future Islands — As Long as You Are
Novaja płytka amierykanskaha hurta, hałoŭnyja fiški jakoha — aksamitny hołas Sema Cherynha i niepaŭtornyja jahonyja ž tancy, atrymałasia bolš razvažlivaj za papiarednija i mienš dynamičnaj, na naš pohlad.
U toj ža čas heta vielmi darosły reliz, napoŭnieny harmonijaj i nadziejaj na toje, što pobač zaŭsiody buduć ludzi, jakija nie pakinuć słuchača sam-nasam.
Woodkid — S16
Francuzski klipmejkier, hrafičny dyzajnier i aŭtar-vykanaŭca Joan Lemuan viadomy ŭ muzyčnym śviecie jak Woodkid.
Siem hadoŭ tamu jon vypuściŭ debiutny albom «The Golden Age», jaki prasłaviŭ aŭtara dzivosnymi miełodyjami i zapaminalnymi klipami.
Viarnuŭšysia ŭ hetym hodzie, Woodkid pradstaviŭ publicy bolš minimalistyčnuju viersiju svajho stylu ź miełanchaličnym nastrojem.
Daj Darohu! — Pod voj sobak
(aściarožna: niecenzurnaja leksika)
Bresckija panki anansavali vychad alboma na žnivień, ale z-za viadomych padziej reliz adkłaŭsia. Ad hetaha jon nie straciŭ aktualnaść, chutčej naadvarot.
18 trekaŭ, siarod jakich jak śviežyja chity, tak i tyja, jakija ŭžo palubilisia słuchačam («Nie vieru», «Pomohi», «Baju-baj»). Na vokładcy — kuča znajomych vobrazaŭ i tvaraŭ.
Nothing But Thieves — Moral Panic
Treci albom brytanskaha hurta byŭ sustrety krytykami nieadnaznačna: adny adznačyli, što heta bolš padobna da kroku ŭbok, čym da kroku napierad.
Inšyja ŭchvalajuć śmiełaść kalektyvu, jaki ŭpeŭnieny ŭ svaim słuchačy i nie baicca ekśpierymientavać.
Gorillaz — Song Machine, Season One: Strange Timez
Song Machine — heta nie zusim albom, a niešta kštałtu muzyčnaha sieryjała, jaki składajecca z muzyčnych «epizodaŭ» z roznymi znakamitymi haściami. U stvareńni alboma ŭziali ŭdzieł Ełtan Džon, Robiert Śmit (u ficie z salistam The Cure zhadvajecca, darečy, Biełaruś), Schoolboy Q i inšyja viadomyja muzykanty.
U płytki nie isnuje adzinaj usioabdymnaj temy abo kancepcyi. Strakataść u nastrojach i saŭndzie, mahčyma, i stvarajuć sens reliza.
Faithless — All Blessed
10 hadoŭ tamu było abvieščana pra zakryćcio prajekta Faithless. Adbylisia raźvitalnyja kancerty, i na hetym historyja kalektyvu pavinna była skončycca. Ale niečakana muzyki vyrašyli viarnucca z novaj muzykaj.
U pracy nad novym albomam nie ŭziaŭ udziełu firmovy hołas lehiendarnaha trya — Maxi Jazz. Z-za hetaha novy albom słuchajecca inakš, čym papiarednija.
Bring Me The Horizon — Post Human: Survival Horror
U recenzijach albom nazyvajuć najlepšym saŭndtrekam da kanca śvietu. Muzykanty zapisvali jaho dystancyjna, pa videasuviazi, a sama płytka natchnionaja zmročnymi padziejami biahučaha hoda.
