Nastaŭnica z Bresckaj vobłaści vyjhrała ŭ jubilejnaj pieradačy «Pole cudaŭ» 16 pryzoŭ — i aŭtamabil
Nastaŭnica pačatkovych kłasaŭ z Drahičyna Natalla Švarniuk na jubilejnaj pieradačy «Pole cudaŭ» (prahramie — 30 hadoŭ) vyjhrała aŭtamabil, paviedamlaje hazieta «Zaria». Prahramu pakazali pa TB u piatnicu.
Natalla na fota sprava, zarya.by
Natalla ŭdzielničała ŭ prahramie ŭ nacyjanalnym biełaruskim kaściumie. Pakolki jana naradziłasia i vyrasła ŭ Drahičynskim rajonie, jaki viadomy vyroščvańniem jahadnych kultur, vykładčyca pryviezła na šou kłubnicy.
Taksama razam sa svajoj hrupaj padtrymki — ansamblem narodnaj pieśni «Zaranačka» Natalla pryhatavała draniki, kałduny i inšyja stravy biełaruskaj kuchni. U padarunak ad kiraŭnictva miascovaj haspadarki žančyna prezientavała syry.
Nie mienš pryjemnym siurpryzam dla viadučaha staŭ ułasny vierš.
zarya.by
Natalla vyjhrała ŭ druhoj trojcy i finale. Na zaroblenyja bały jana vybrała padarunki: nabor dla zimovaj rybałki, noŭtbuk, kamplekt paścieli, nabor bytavoj techniki, jaki składajecca z trynaccaci pradmietaŭ (chaładzilnika, televizara, mikrachvalevaj piečy, kavavarki, paravarki, chlebapiečki, kulera i inš.). A zatym vyrašyłasia na supierhulniu i vyjhrała aŭtamabil Lada.
U supierfinale treba było adhadać nastupnaje słova: jak u staražytnaj Rusi nazyvali imianiny cara? Natalla siarod litar adhadała litaru «t», a zatym i ŭsio słova — Tiezoimienitstvo.
zarya.by
Ale pierš čym patrapić za baraban na «Pole cudaŭ», niahledziačy na papiaredniuju padrychtoŭku, źviazanuju ź miedycynskimi analizami, pryjezd u Maskvu staŭ niekatorym vyprabavańniem. Na biełaruska-rasijskaj miažy Natalli i jaje kamandzie pryjšłosia kala vaśmi hadzin zatrymacca. Była dadatkovaja pravierka słužby biaśpieki. Kropku ŭ hetym pytańni pastaviła biełaruskaje pasolstva.
