Hamielčuka źbili i asudzili na 15 sutak za fota la administracyi
Fota pikietu kala administracyi Savieckaha rajonu Homla 21 kastryčnika.
Sud Savieckaha rajonu 23 kastryčnika pakaraŭ 43-hadovaha žychara Homla Stanisłava Mačałava aryštam na 15 sutak za fota ź bieł-čyrvona-biełym ściaham la rajonnaj administracyi, piša Radyjo Svaboda.
Uviečary 21 kastryčnika ŭ homielskich telehram-čatach źjaviŭsia zdymak ludziej ź bieł-čyrvona-biełymi ściahami kala administracyi Savieckaha rajonu Homla. Paśla publikacyi fota, jak śviedčać žychary rajonu, pačałasia abłava AMAP.
«Niekalki čałaviek zatrymali kala kinateatru «Kastryčnik». Jašče adnaho spynili kala 23.00 kala handlovaha domu «Rečycki» (abodva abjekty — za niekalki prypynkaŭ hramadzkaha transpartu ad rajonnaj administracyi. — RS). Jon išoŭ z pryjacielem. Pryjaciel uciok, a mužčynu abšukali i znajšli ŭ zaplečniku ściah. Jaho zabrali ŭ milicyju i tam pabili», — paviedamiła Svabodzie žycharka mikrarajonu Festyvalny.
Ihar, brat zatrymanaha Stanisłava Mačałava, raskazaŭ, što tryvohu padniali baćki, kali syn nie viarnuŭsia dachaty. Brat znajšoŭ Stanisłava ŭ Savieckim RAUS Homla.
«My ź siabrami stajali pad RAUSam i kala treciaj hadziny nočy ŭbačyli, jak Stanisłava vyvodziać — jaho vieźli na IČU. My ŭbačyli, što ŭ jaho pabity tvar, voka zapłyła, što jon kulhaje i ledźvie ruchajecca. Vidać, jaho mocna pabili», — kaža Ihar.
«Nia viedaŭ, što fatahrafavańnie — heta niesankcyjanavanaje mierapryjemstva»
Blizkich i svajakoŭ na sud nie puścili, bo nibyta karanavirus. Ale i sudździa, i sakratarka byli biaz masak.
Milicyja skłała dva pratakoły. Pavodle ich, Mačałaŭ udzielničaŭ u niesankcyjanavanym mitynhu kala administracyi Savieckaha rajonu, a taksama «chapaŭsia za formu supracoŭnikaŭ», to bok ździejśniŭ niepadparadkavańnie.
«Uciakaŭ — pryznaju, za formu nie chapaŭsia. Ja ŭpaŭ, i kali mianie zatrymlivali, to załamali ruki za śpinu — u mianie bol byŭ va ŭsim ciele», — patłumačyŭ Stanisłaŭ.
Pavodle abvinavačanaha, jamu prapanavali sfatahrafavacca na fonie administracyi, i jon «nia viedaŭ, što fatahrafavańnie — heta niesankcyjanavanaje mierapryjemstva».
«Ja ŭciakaŭ (ad AMAPu. — RS), bo ŭsprymaju milicyju jak niebiaśpieku. Adnojčy ŭ biaźludnym miescy mianie aštrafavali za adsutnaść flikiera», — raskazaŭ na sudzie zatrymany.
U sudzie začytvali rapart supracoŭnikaŭ AMAP, jakija tłumačyli, što šukali nočču ludziej, jakija mohuć być datyčnyja da niesankcyjanavanaha mitynhu, tamu Stanisłava ŭbačyli kala handlovaha centru «Rečycki» i zatrymali.
«U jaho była znojdziena atrybutyka charakternaha bieł-čyrvona-biełaha koleru», — zaznačana ŭ raparcie AMAP.
Stanisłaŭ u sudzie tłumačyŭ, što «niechta nas fatahrafavaŭ kala administracyi, ja dumaŭ, što paźniej mnie pieradaduć zdymak».
«Ja tych ludziej nia viedaju, jakija prapanavali sfatahrafavacca, ale jany časam źbirajucca na Viečnym ahni. Ja dumaŭ, što ŭsio-tki jość ludzi, nieabyjakavyja da sytuacyi ŭ našaj krainie», — kazaŭ na sudzie žychar Homla.
