Ź Biełarusi departavali ŭkrainca, jaki nibyta byŭ na akcyi pratestu. Za im źjedzie i siamja
Ź Biełarusi prymusova vysłali 36-hadovaha ŭkrainca za toje, što byŭ zatrymany na akcyi pratestu, piša Tut.by.
Maryja i Jaŭhien Kiryčenki pryjechali ŭ Biełaruś z Danieckaj vobłaści šeść hadoŭ tamu. Biehli ad vajny. Uładkavalisia na pracu, atrymali pakoj u internacie, tut u pieršy kłas pajšoŭ ich syn Kirył. Ciapier chłopiec u šostym — i škołu znoŭ daviadziecca mianiać.
Pa zakonie inšaziemiec moža być vysłany ź Biełarusi ŭ intaresach nacyjanalnaj biaśpieki, hramadskaha paradku, abarony maralnaści, zdaroŭja nasielnictva, pravoŭ i svabod hramadzian Respubliki Biełaruś i inšych asob, a taksama paśla vyzvaleńnia z aryštnaha doma abo papraŭčaj ustanovy, kali jaho nie možna departavać.
Siamja viartajecca ŭ Mirnahrad (pakul siamji nie było, tak pierajmienavali horad Dzimitraŭ u Danieckaj vobłaści). Hałava siamiejstva ŭžo źjechaŭ.
11 žniŭnia mužčynu zatrymali na vulicy Savieckaj u Homieli niedaloka ad kramy «Kapieječka» i pavieźli ŭ RAUS. Žonka kaža, što ni ŭ jakich masavych mierapryjemstvach jon u toj viečar nie ŭdzielničaŭ: stajaŭ kala kramy i razmaŭlaŭ praz telefon z synam. Ale sud vyrašyŭ inakš: 12 žniŭnia za «parušeńnie paradku praviadzieńnia masavych mierapryjemstvaŭ» i «niepadparadkavańnie zakonnamu patrabavańniu słužbovaj asoby pry vykanańni słužbovych paŭnamoctvaŭ» mužčynu dali 12 sutak aryštu.
Praŭda, praz troje sutak Jaŭhiena, raspaviadaje Maryja, vypuścili.
— Muž pryjšoŭ uvieś sini. Skardziŭsia na boli ŭ hałavie i śpinie, raspaviadaŭ, što mocna bili. I kali vieźli ŭ RAUS, i ŭžo ŭ samim RAUS. Asabliva kali daviedalisia, što ŭkrainiec. Uspaminaje, što kazali jamu: «Dyk heta ty mianie, padła, paliŭ na Majdanie!» Muž ni na jakim Majdanie nie byŭ, — kaža Maryja.
Jaŭhien źniaŭ paboi i napisaŭ zajavu ŭ Śledčy kamitet. Heta, na dumku Maryi, i paŭpłyvała na dalejšy chod raźvićcia padziej.
22 vieraśnia Jaŭhiena vyklikali ŭ adździeł pa hramadzianstvie i mihracyi i paviedamili, što jamu pryjdziecca adsiedzieć jašče tyja dzieviać sutak, jakija jon niedasiadzieŭ u žniŭni. A paśla paviedamili, što pryniata rašeńnie ab vysyłcy jaho z krainy z zabaronaj na ŭjezd terminam na 3 hady.
Na dniach mužčynu vysadzili na biełaruska-ŭkrainskaj miažy. Nieŭzabavie pryjdziecca źjechać ź Biełarusi i jaho žoncy z synam: siamja rasstavacca nie źbirajecca.
