«My zaŭsiody budziem vitać ludziej»: Ukraina abvierhła zakidy biełaruskaha MZS u niedružalubnaści
Ukraina abviarhaje abvinavačvańni Minska ŭ niedružalubnych dziejańniach i zaŭsiody budzie vitać ludziej, jakija padzialajuć hetyja kaštoŭnaści i chočuć realizavać siabie va Ukrainie, zajavili ŭ Ministerstvie zamiežnych spraŭ Ukrainy, paviedamlaje interfax.com.ua.
«Ukraina abviarhaje abvinavačvańni Minska ŭ niepryjaznych dziejańniach. Naša dziaržava tradycyjna adkrytaja i družalubnaja dla hramadzian Biełarusi. Jašče da pačatku kryzisu ŭ Biełarusi ruch pamiž našymi krainami byŭ maksimalna svabodnym, a mižčałaviečyja i biznes-kantakty ŭsio macnieli», — havorycca ŭ adkazie śpikiera MZS Ukrainy Kaciaryny Zielanko.
Jana adznačyła, što Ukraina — demakratyčnaja jeŭrapiejskaja dziaržava, addanaja jeŭrapiejskim kaštoŭnaściam, siarod jakich abarona pravoŭ i svabod čałavieka maje fundamientalnaje značeńnie.
«My zaŭsiody budziem vitać va Ukrainie ludziej, jakija padzialajuć hetyja kaštoŭnaści i chočuć realizavać siabie ŭ našaj dziaržavie», — padkreślili ŭ Ministerstvie.
U sieradu ŭ Ministerstva zamiežnych spraŭ Biełarusi byŭ vyklikany pasoł Ukrainy Ihar Kizima. Ukrainskamu dypłamatu była ŭručanaja nota MZS, u jakoj biełaruski bok «vykazaŭ zakłapočanaść» pryniaćciem ukaza Uładzimira Zialenskaha ab IT-śpiecyjalistach. U MZS Biełarusi padkreślili, što dadzieny pravavy akt nielha traktavać pa-inšamu, jak vidavočna niedružaluny i dyskryminacyjny krok ŭkrainskaha boku, jaki miažuje z umiašalnictvam va ŭnutranyja spravy Biełarusi.