Vaskrasienski ab sustrečy z Łukašenkam u SIZA: Usio było dobraachvotna
Były kaardynatar apazicyjnaha štaba Juryj Vaskrasienski na telekanale ANT raspavioŭ padrabiaznaści sustrečy Łukašenki z palitviaźniami ŭ SIZA KDB.
«Usio było dobraachvotna. Da apošniaj siekundy, da ŭvachodu prezidenta nichto nie viedaŭ, što adbudziecca. Kali prezident uvajšoŭ, jon skazaŭ, što tryhieram jaho vizitu ŭ SIZA stała prahrama Marata Markava «Ničoha asabistaha», paśla hetaha jon vyrašyŭ zmahacca za kožnaha svajho hramadzianina, tamu sabraŭ aktyŭ, jaki znachodzicca ŭ SIZA, i zaprasiŭ ich na razmovu», — raspavioŭ Jury Vaskrasienski.
«Ciapier pišuć, što heta byŭ manałoh, ale heta byŭ absalutny dyjałoh. U asnoŭnym kazali my, i absalutna svabodna, u tym liku na temu papravak u Kanstytucyju», — adznačyŭ Vaskrasienski.
Jon dadaŭ, što, zaviaršajučy sustreču, Łukašenka paprasiŭ jaho padsumavać usie ahučanyja prapanovy i skłaści śpis asob, jakim možna było b źmianić mieru strymańnia.
Pa słovach Vaskrasienskaha, padčas sustrečy, u pryvatnaści, prapanoŭvali abmiežavać kolkaść terminaŭ abrańnia prezidenta dvuma, umacavać niezaležnaść sudovaj sistemy až da ŭviadzieńnia sudoŭ prysiažnych, dać bolš paŭnamoctvaŭ hubiernataram, zrabić pasadu mera vybarnaj.
