Kańje Uest vystupić u Maskvie z kancertam? Heta čutki
Ale pieramovy sapraŭdy vialisia.
Mash paviedamiŭ, što amierykanski repier Kańje Uest vystupić u Maskvie z kancertam 8 červienia. Kancert projdzie ŭ «Łužnikach» u dzień naradžeńnia repiera. Pieramovy vialisia bolš za hod, a hałoŭnaje žadańnie Kańje — pahladzieć Maskvu i dać «kruty» kancert. A paśla — adśviatkavać 47-hodździe ŭ adnym ź miescaŭ stalicy. Sam artyst pryznaŭsia — «čakaje, rady i zaradžany na pośpiech».
Adnak jak paźniej napisali «Iźviestija», heta niapraŭda. Tak, čutki pra mahčymy kancert chadzili, adnak nichto nie daŭ hrošaj na vystupleńnie artysta — hanarar Kańje składaje nie mienš za 5 młn dalaraŭ. Pra heta raskazaŭ stvaralnik kancertnaha ahienctva TCI Eduard Ratnikaŭ.
Kali b kancert adbyŭsia, Kańje Uest staŭ by pieršym značnym zachodnim vykanaŭcam, jaki vystupiŭ u Rasii paśla poŭnamaštabnaha ŭvarvańnia va Ukrainu.
U apošni čas suviaź Kańje z Rasijaj stała bližej. Jon uziaŭ na pracu rasijskaha dyzajniera i razam ź im vypuściŭ mierč adzieńnia z nadpisami na ruskaj movie, u tym liku i niecenzurnym.
U 2022 hodzie Uest prapanoŭvaŭ Uładzimiru Pucinu asabistuju sustreču, na jakoj jany mahli b pahavaryć pa dušach ab nadzionnych pytańniach pamiž krainami. U 2020 hodzie artyst mieŭ namier bałatavacca ŭ prezidenty ZŠA.
