Paśla pratestaŭ u Minsku zatrymany druhi syn kiraŭnika Viciebska. Jaho mašynu raźbili siłaviki
Pozna ŭviečary 12 kastryčnika asoby ŭ bałakłavach, trenikach, broniekamizelkach i šlemach z dubinkami raźbili škło ŭ adnoj z mašyn kala ŭniviersama «Ryha» i vyciahnuli kiroŭcu. Jaho zatrymali, a mašyna z klučom zapalvańnia zastałasia stajać na parkoŭcy.
Jak stała viadoma «Našaj Nivie», zatrymany kiroŭca — Vadzimir Zarankin, syn kiraŭnika Viciebska Vadzima Zarankina.
Vadzimir Zarankin
Situacyja admietnaja tym, što inšy syn top-čynoŭnika, Filip, tolki niadaŭna vyjšaŭ ź izalatara ŭ Žodzinie, adsiedzieŭšy tam 13 sutak. Jaho zatrymali ŭ centry Minska ŭviečary paśla inaŭhuracyi Alaksandra Łukašenki.
Čytajcie taksama: «Kanvairy dali mianušku Mer». Syn kiraŭnika Viciebska raskazaŭ pra 13 sutak aryštu paśla inaŭhuracyi Łukašenki
Što ž adbyłosia kala ŭniviersama «Ryha»? Vadzimir Zarankin jechaŭ u kramu, kali siłaviki pačali začystku rajona. Najchutčej, jon spałochaŭsia i pasprabavaŭ vyjechać ź niebiaśpiečnaha miesca, adnak padčas hetaha začapiŭ inšuju mašynu. U vyniku čałaviek 15 dahnali aŭtamabil Vadzimira, raźbili škło i vyciahnuli chłopca. Zatrymali i jaho, i kiroŭcu druhoj mašyny. Jany abodva znachodziacca ŭ Savieckim RAUSie.
