U Barysavie 20-hadovaha zvarščyka asudzili na 3,5 hoda za sutyčku ź milicyjaj. Što heta było i chto heta taki?
Jaŭhien Pietračenka asudžany pa artykule 364 Kryminalnaha kodeksa «Hvałt albo pahroza prymianieńnia hvałtu ŭ adnosinach supracoŭnika ŭnutranych spraŭ» na 3,5 hoda kałonii ahulnaha režymu. U noč vybaraŭ jon šturchanuŭ turnikiet na milicyjaniera.
Jaŭhien Pietryčenka. Fota pradstaŭlena siabrami.
Pozna ŭviečary 9 žniŭnia na centralnuju płošču Barysava pryjšli ludzi, kab vykazać svoj pratest z nahody falsifikacyi vybaraŭ. Siarod ich byŭ i 20-hadovy Jaŭhien Pietračenka, elektrazvarščyk miascovaha žalezabietonnaha zavoda.
Na videa, jakoje raspaŭsiudziła milicyja, bačna, što Jaŭhien (u žoŭtaj majcy) šturchaje turnikiet na supracoŭnikaŭ milicyi, a potym pačynajecca kantakt.
«Žeńka sam pa sabie maleńki i sprytny. Adzin z amapaŭcaŭ zamachnuŭsia na jaho dubinkaj, tamu Ženia i adpichnuŭ turnikiet, jaki trapiŭ pa nazie milicyjaniera. Jany byli ŭ abarončych šlemach, adpaviedna, zabrały ŭ ich pavinny byli być zakrytyja, ale ŭ milicyjaniera byli adkrytyja. Skazali, što Ženia raźbiŭ jamu nos i hubu», — kaža Jula, najlepšaja siabroŭka Pietračenki.
Zatrymali chłopca na nastupny dzień kala padjezda. Dziažuryli pad domam, kali mašyna ź Pietračenkam padjechała, to jaho adrazu vyciahnuli ź jaje. «Udaryli dubinkaj pa hałavie, jon straciŭ prytomnaść, tak i advieźli ŭ milicyju», — kaža Jula.
Jaŭhien — futbolny fanat, tamu milicyi ŭ horadzie jon byŭ znajomy dobra. Fanaty skidvalisia na advakata chłopcu. Spačatku rodnych pałochali, što sudzić buduć i za masavyja biesparadki, ale ŭ vyniku jamu inkryminavali tolki adzin artykuł.
Sud ciahnuŭsia dva dni. Paciarpieły Arciom Płaskonny na sudzie skazaŭ, što nie maje pretenzij da Pietračenki, ale jamu było «kryŭdna, što da jaho tak pastavilisia». Sam Pietračenka ŭ apošnim słovie kazaŭ, što na voli ad jaho budzie bolš karyści i jon biaśpiečny dla hramadstva. Charaktarystyki z pracy byli vydatnymi.
Prakuror prasiła asudzić Jaŭhiena na 3 hady źniavoleńnia, ale sudździa Natalla Dzieravianka dała navat bolej — 3,5 hoda. Rodnyja navat nie ŭpeŭnienyja, što buduć abskardžvać hetaje rašeńnie. Jula kaža, što budzie źviartacca da pravaabaroncaŭ z prapanovaj pryznać Pietryčenku palitviaźniem.
Raniej u Jaŭhiena była sudzimaść za naniasieńnie paškodžańniaŭ pa nieaściarožienaści. Rodnyja kažuć, što jana była źviazanaja z fanactvam, ale nie ŭdakładniajuć abstaviny. Praŭładnyja źliŭnyja telehram-kanały śćviardžajuć, što Pietračenku niekali sudzili jašče i za kradziež.
Jaŭhien rodam z Barysava, hadavaŭsia na vulicy Vatucina. Baćki daŭno razyšlisia, jaho hadavała adna mama. U chłopca jość niepaŭnaletniaja siastra.
