Dzianisa Dudzinskaha i Dźmitryja Kachno znoŭ buduć sudzić
U raskładzie suda Zavodckaha rajona čytačy Tut.by zaŭvažyli proźviščy televiadučych Dźmitryja Kachno i Dzianisa Dudzinskaha, jakija raniej užo adsiadzieli 11,5 sutak za ŭdzieł u akcyjach pratestu.
U raskładzie suda napisana, što pasiadžeńni pavinny byli adbycca 8 kastryčnika a 10-j ranicy, adnak viadučych na ich nie było, i sudy pieranieśli.
Dzianisa Dudzinskaha buduć sudzić pa art. 23.34 KaAP (Parušeńnie paradku arhanizacyi abo praviadzieńnia masavych mierapryjemstvaŭ), a Dźmitryja Kachno pa art. 23.4 KaAP (Niepadparadkavańnie słužbovaj asobie).
«Pra toje, što ŭ mianie siońnia pavinien byŭ być sud, ja daviedaŭsia siońnia. Pryčym vypadkova. Patelefanavali siabry, skazali, što zaŭvažyli majo proźvišča ŭ raskładzie, — raspaviadaje Dzianis Dudzinski. — U hety čas ja znachodziŭsia za 150 kiłamietraŭ ad Minska i nie moh pryjechać na praces».
Pavodle Dudzinskaha, pakolki jaho svoječasova nie apaviaścili pra sud, pasiadžeńnie pieranieśli na 12 kastryčnika. Jon skazaŭ, što zdahadvajecca, u suviazi z čym jaho znoŭ zaprašajuć u sud, ale ahučvać hetuju viersiju pakul nie staŭ. Mahčyma, kaža, pamylajecca.
Dźmitryj Kachno siońnia taksama nie prysutničaŭ u sudzie i pakul nie staŭ kamientavać situacyju. «Ciapier my z žonkaj čakajem naradžeńnia dački — heta dla mianie samaje hałoŭnaje», — dadaŭ jon.
Dzianisa Dudzinskaha i Dźmitryja Kachno zatrymali 2 vieraśnia i asudzili na 10 sutak aryštu kožnaha za ŭdzieł u niesankcyjanavanych akcyjach. Jany mielisia vyjści viečaram 10 vieraśnia, ale adsiedzieli ŭ izalatary na Akreścina amal na 2 dni bolš.