Prakuror Bresckaj vobłaści — ab hibieli Hienadzia Šutava: Ničoha hieraičnaha z boku zahinułaha nie było
Prakuror Bresckaj vobłaści Viktar Klimaŭ na sustrečy sa studentami Bresckaha dziaržaŭnaha techničnaha ŭniviersiteta 6 kastryčnika prakamientavaŭ hibiel Hienadzia Šutava — 44-hadovaha mužčyny, jaki atrymaŭ śmiarotnaje ranieńnie ŭ hałavu padčas pratestaŭ 11 žniŭnia ŭ Breście. Na videa, jakoje źjaviłasia ŭ siecivie, Klimaŭ zajaŭlaje, što «ničoha hieraičnaha z boku zahinułaha nie było», paviedamlaje Bresckaja hazieta.
Pytańnie ab hibieli Hienadzia Šutava padniaŭ adzin z udzielnikaŭ sustrečy. Prakuror adznačyŭ, što nie moža raskryć vyniki rasśledavańnia, spasłaŭšysia na tajamnicu śledstva, adnak niekatoryja detali ŭsio ž raskryŭ.
«Ja mahu skazać, što nie treba rabić zaŭčasnych vysnoŭ. Hetaj asobaj [Šutava — zaŭv. red.] ździajśnialisia supraćpraŭnyja dziejańni. Heta navat nie abmiarkoŭvajecca. Heta adnaznačna. Zaraz viadziecca śledstva pa hetaj spravie. Zatrymany druhi čałaviek, jaki ź im znachodziŭsia ŭ toj momant. Jon doŭhi čas chavaŭsia. Ciapier jon vyśvietleny, zatrymany, daje pakazańni. Kali budzie sud, vy ŭsio daviedajeciesia», — paabiacaŭ Viktar Klimaŭ.
«Mahu skazać adno: tam ničoha hieraičnaha z boku hetaha, na žal, zahinułaha čałavieka nie było», — dadaŭ prakuror vobłaści.
Nahadajem, paśla padziej 11 žniŭnia svajaki dvoje sutak nie mahli znajści Hienadzia.
Ranicaj 19 žniŭnia Hienadź Šutaŭ pamior u Minskim vajskovym špitali. Uviečary taho ž dnia SK prakamientavaŭ śmierć 44-hadovaha bieraściejca. Pa viersii śledstva, 11 žniŭnia ŭ Breście dvoje mužčyn ździejśnili napad na asob, jakija vykonvali zadačy pa achovie hramadskaha paradku pry praviadzieńni niesankcyjanavanaha masavaha mierapryjemstva.
