Sanstancyja zakryła kafe ŭ Minsku, dzie rabili bieł-čyrvona-biełuju šaŭrmu
«Ekspres šaŭrma» — heta kropka na Leninhradskaj, 2 u Minsku, pobač z čyhunačnym vakzałam. Jana pracavała ŭžo paŭtara hoda, a viadomaść zdabyła sioleta.
Sprava ŭ tym, što tut pačali rabić «bieł-čyrvona-biełuju» šaŭrmu, nanosili na stravu čyrvonuju stužku z sousa. Čarha za takoj stravaj časam stajała pa hadzinie.
Plus da ŭsiaho va ŭstanovie davali 20%-ju źnižku tym, chto prychodziŭ ź biełaj stužačkaj, a taksama pa pramakodzie «bčb», nalivali takim ludziam biaspłatny čaj i kavu. Šmat «Ekspres šaŭrma» dapamahała vałancioram Akreścina, pryvozili svaju ježu na płošču Pieramien (vulica Čarviakova).
I heta daloka nie ŭsie sacyjalnyja prajekty šaŭrmičnaj. Naprykład, u samy razhar pandemii karanavirusa jany karmili biaspłatna miedykaŭ, a potym rabili im šaŭrmu pa sabiekošcie. Pieravodzili hrošy dla prytułku dla badziažnych žyvioł na Hurskaha.
«Našaja aktyŭnaść nie zastałasia niezaŭvažanaj», — horka kaža ŭłaśnica ŭstanovy Nastaśsia Tejranava.
Prykładna tydzień tamu ŭ «Ekspres šaŭrmy» pačalisia prablemy. «Pačali chadzić usiemahčymyja pravierki. Nibyta na nas niechta napisaŭ skarhu. Prabačcie, im samim nie śmiešna? Chto budzie skardzicca pažarnym? Tym bolš, raniej u nas z boku MNS usio było vydatna. Sanstancyja nas dabiła kančatkova: tolki adno vypraŭlajem, jak jany nam inšaje pradjaŭlajuć. U vyniku skazali, kali ŭsio nie vypravim, to sprava pojdzie ŭ prakuraturu.
Šmat paŭtarali, što z vašaj dziejnaściu heta nijak nie źviazana. Pa svaich krynicach my daznalisia, što była dadzienaja kamanda nie davać nam pracavać. My zaraz lichamankava sprabujem usio vypravić, ale nie chapaje ni hrošaj, ni siłaŭ», — raskazvaje Anastasija.
Haspadary kafe kažuć, što nikoli nie karystalisia dapamohaj ludziej, ale nie vyklučajuć, što ciapier moža być jakraz takaja situacyja. Dakumient ab prypynieńni pracy «Ekspres šaŭrmy» padpisała hałoŭny sanitarny ŭrač Minska Śviatłana Jarmak.
Šaŭrma — heta blizkaŭschodniaja strava ź miasa, jakoje absmažanaje na vierciele, zahornutaje ŭ łavaš z dadatkam harodniny, śpiecyj i sousaŭ. Mabyć, samy papularny strytfud u Minsku.
