Kiraŭnik rajona Viciebska, jaki prymusiŭ nastaŭnikaŭ na vybarach pierapisać pratakoł, syšoŭ z pasady
Fota Siarhieja Sierabro, «Narodnyja naviny Viciebska»
Čynoŭnik Siarhiej Stašeŭski, jaki, jak miarkujecca, 9 žniŭnia prymusiŭ nastaŭnikaŭ na vybarčym učastku №25 pierapisać pratakoł hałasavańnia na karyść kandydata ŭ prezidenty Alaksandra Łukašenki, bolš nie źjaŭlajecca kiraŭnikom administracyi Kastryčnickaha rajona Viciebska, piša Tut.by.
Z ułasnych krynic Tut.by stała viadoma, što 1 kastryčnika Siarhieja Stašeŭskaha pravodzili z pasady kiraŭnika rajonnaj administracyi. Dzie i kim jon budzie pracavać, pakul nieviadoma.
2 kastryčnika proźvišča, imia i fota Stašeŭskaha prybrali z raździeła «kiraŭnictva» na sajcie administracyi Kastryčnickaha rajona Viciebska.
Nahadajem, paśla vybaraŭ u internecie źjaviŭsia aŭdyjozapis, na jakim, jak miarkujecca, były kiraŭnik Kastryčnickaha rajona Viciebska Siarhiej Stašeŭski sustrakajecca z členami kamisii ŭčastka №25 u SŠ №44 paśla padliku hałasoŭ i prymušaje ich pierapisać pratakoł, kab u kandydata ŭ prezidenty Śviatłany Cichanoŭskaj zastałosia ŭsiaho 20%, choć mienavita jana pieramahła na hetym učastku.
17 žniŭnia, na sustrečy z delehacyjaj haradžan, jakija mirna pratestujuć suprać vynikaŭ vybaraŭ, hubiernatar Mikałaj Šarstnioŭ zajaviŭ, što ŭ dačynieńni da Siarhieja Stašeŭskaha pravodzicca pravierka. Jon nie ŭdakładniŭ, chto jaje inicyjavaŭ — abłasnyja ŭłady abo siłavyja struktury.
Ci skončyłasia hetaja pravierka i čym — nieviadoma. Paŭtary tydni tamu Tut.by adpraviŭ na imia staršyni abłvykankama aficyjny zapyt z prośbaj paviedamić ab vynikach pravierki ŭ dačynieńni da Stašeŭskaha. Adkazu na jaho pakul niama.
U žniŭni-vieraśni žurnalist Tut.by sprabavała datelefanavacca da Siarhieja Stašeŭskaha asabista. Adnak u pryjomnaj Administracyi rajona spačatku kazali, što jon znachodzicca ŭ adpačynku, potym — što jaho niama na pracoŭnym miescy.
Siarhiej Stašeŭski naradziŭsia ŭ 1975 hodzie ŭ horadzie Bielcy (Respublika Małdova). Skončyŭ BDU pa śpiecyjalnaści «pravaznaŭstva» i Akademiju kiravańnia pry prezidencie pa śpiecyjalnaści «dziaržaŭnaje i miascovaje kiravańnie».
Karjeru pačaŭ u stalicy, u adździele sacyjalnaha zabieśpiačeńnia Leninskaha rajona Minska, zatym pracavaŭ na roznych pasadach u Minpracy. Z 2004 pa 2007 hady — hałoŭny śpiecyjalist aparata Saŭmina, paźniej — pamočnik namieśnika premjer-ministra.
U Viciebsk pierajechaŭ 11 hadoŭ tamu. Spačatku byŭ namieśnikam, a potym kiraŭnikom miascovaj administracyi SEZ.
Kastryčnickim rajonam Viciebska Stašeŭski kiravaŭ amal 6 hadoŭ.