Zatrymali jašče adnu supracoŭnicu homielskich «Mocnych navin» — videakarespandenta Nadzieju Pužynskuju
Nadzieja Pužynskaja sprava. Fota vk.com
U niadzielu zatrymali videakarespandenta Homielskaha vydańnia «Mocnyja naviny» Nadzieju Pužynskuju. Pra heta paviedamiŭ zasnavalnik vydańnia Piotr Kuźniacoŭ, piša Tut.by.
U subotu, 3 kastryčnika, u Homieli zatrymali hałoŭnaha redaktara «Mocnych navin» Hannu Jakštas i jaje žonka Dzianisa, jaki taksama źjaŭlajecca rabotnikam vydańnia. Pa słovach Piatra Kuźniacova, ich supracoŭniki znachodziacca ŭ IČU.
— Nadzieja z rodnymi Dzianisa paviezła im pieradaču ŭ izalatar. Nakolki ja viedaju, joj tam niechta patelefanavaŭ, jana adyšła i źnikła, a potym paviedamiła, što znachodzicca ŭ Savieckim RAUS — raspaviadaje Piotr.
— U samim RAUS heta admaŭlali, ale my datelefanavalisia da Vitala Prystromava (aficyjnaha pradstaŭnika UUS Homielskaha abłvykankama), jon paćvierdziŭ: Nadzieja zatrymanaja ŭ suviazi ź viadzieńniem administracyjnaha pracesu pa artykule 23.34 KoAP (Parušeńnie paradku arhanizacyi abo praviadzieńnia masavych mierapryjemstvaŭ). Za jaki mienavita epizod, jon nie skazaŭ, ale adznačyŭ: «Tam jość padstavy».
Što heta za padstavy, Piotr Kuźniacoŭ nie viedaje. Pa jaho słovach, «za apošni miesiac» Nadzieja 10 dzion praviała ŭ špitali.
— Z balnicy viarnułasia ź niejkim virusam, potym dva tydni ad jaho lačyłasia doma na samaizalacyi — kaža surazmoŭca. — Na pracu jana viarnułasia tolki ŭ hety paniadziełak, ale nijakich masavych mierapryjemstvaŭ z paniadziełka ŭ Homieli nie było. Nidzie na praciahu apošniaha miesiaca jana praktyčna nie prysutničała.
