ES uvodzić sankcyi suprać 40 aficyjnych asob Biełarusi. Łukašenka nie ŭvajšoŭ u śpis
Jeŭrasajuz z 2 kastryčnika ŭviadzie sankcyi ŭ dačynieńni da prykładna 40 aficyjnych asob Biełarusi, adkaznych za falsifikacyju vybaraŭ i parušeńnie pravoŭ čałavieka. Pra heta zajaviŭ kiraŭnik Jeŭrarady Šarl Mišel na pres-kanfierencyi pa vynikach pieršaha dnia samitu ES u Bruseli, jaki pačaŭsia ŭ čaćvier i zaviaršyŭsia za poŭnač, piša TASS.
«My vyrašyli realizavać sankcyi, jakija my ŭzhadnili ŭ žniŭni. Heta aznačaje, što zaŭtra (u piatnicu-zaŭv. TASS) piśmovaj praceduraj budzie realizavany čorny śpis z prykładna 40 imionaŭ», — skazaŭ jon, adznačyŭšy pry hetym, što Alaksandr Łukašenka pakul nie ŭvachodzić u śpis.
U svaju čarhu prezident Francyi Emaniuel Makron padkreśliŭ, što ES nie ŭvioŭ sankcyj suprać Łukašenki, pakolki heta padarvała b patrabavańnie Brusela pačać dyjałoh z apazicyjaj pry pasiarednictvie ABSIE i vyzvalić palitviaźniaŭ.
«Heta [sankcyi] dało b Łukašenku zakonnyja padstavy admovicca ad vykanańnia hetych umoŭ», — padkreśliŭ jon.
Hetyja sankcyi Jeŭraźviaz paabiacaŭ uvieści jašče na ekstranaj sustrečy kiraŭnikoŭ MZS 14 žniŭnia. Paŭtara miesiaca ŭviadzieńnie sankcyj błakavaŭ Kipr, patrabujučy naŭzamien ad partnioraŭ pa ES uvieści žorstkija sankcyi suprać Turcyi za hieołaharaźviedačnuju dziejnaść pa pošuku hazavych radoviščaŭ na sprečnym šelfie ŭ Mižziemnym mory.
