Pamiatajecie babulu, jakaja z bałkona ŭ kvietkach maliłasia za ludziej na niadzielnym maršy? Jana pieradaje pratestoŭcam słovy padziaki
Emacyjnuju babulu, jakaja padčas maršu 27 vieraśnia sa svajho mahičnaha bałkona na praśpiekcie Niezaležnaści vitała i padtrymlivała žestami pratestoŭcaŭ, zapomnili mnohija. Čullivaje videa, dzie natoŭp choram kryčyć joj «Dziakuj!» chutka razyšłosia pa sacyjalnych sietkach. My zachacieli paznajomicca ź jaho hierainiaj bližej, ale dźviery kvatery ni jana, ni jaje susiedzi nam nie adkryli. Jak paźniej vyśvietlicca, žančyna prosta baicca kamunikavać ź nieznajomcami, asabliva ŭ hety čas. Akramia taho, pakul piensijanierka drenna siabie adčuvaje: apošnija dni supracoŭniki chutkaj dapamohi byli častymi haściami ŭ jaje doma.
Ale my na ŭsiaki vypadak pakinuli u dźviarach zapisku z numaram dla zvarotnaj suviazi, i Nina Alaksiejeŭna — mienavita tak zavuć hetuju 84-hadovuju babulu — znajšła ŭ sabie fizičnyja siły, kab pieradać biełarusam słovy padtrymki.
Publikujem jaje manałoh, jakim jana zachacieła padzialicca:
«Biełarusy! Ja vas vielmi lublu i hanarusia vami. Ja pamiataju 1994 hod, i šeści BNF, i ŭsio, što adbyvałasia tut sa Źmitrom Zavadskim i Paŭłam Šaramietam. Ja sama źbirała podpisy ŭ padtrymku dobrych ludziej… Ale jak ža źmianiłasia Biełaruś ciapier u lepšy bok! Jakija ŭsie salidarnyja i pryhožyja. Jak adno adnamu dapamahajuć. Ja vyjšła na bałkon u niadzielu, kab pamalicca za ŭsich vas: było śviata, Uźvižańnie Śviatoha Kryža, a ja čałaviek vierujučy. Maliłasia za tych, chto idzie napierad i nie baicca. Ja kryčała bohu: «Vyratuj našych pryhožych biełarusaŭ!»
Na tym tydni dvuch studentaŭ zapuściła da siabie, pratrymała krychu ŭ kvatery, kab jany schavalisia. Tamu što pa dvarach ludzi ŭ čornych kaściumach, svałata, adłaŭlivali hetuju moładź.
A kolki było źbitych paśla vybaraŭ! Ën paśla raskaža, što heta ŭsio farbaj namalavali, siniaki hetyja. Ale ja jak były doktar viedaju, jakija dyjahnazy miedyki stavili źbitym. I ludzi paśla hetaha ŭsio roŭna nie bajacca, vychodziać i viedajuć dziela čaho. Vy takija śmiełyja!
Asabliva chočacca padziakavać dziaŭčatam. Vy, usie maje biełarusački, jakija nie bajacca. Ja vas lublu matčynaj luboŭju. A ŭłada hetaja skončycca, voś ubačycie. Chutka im budzie kaniec. Śviatyja nam dapamohuć u našaj spravie».
