Navukoŭcy: Imunitet da karanavirusa z časam źnižajecca
Niamieckija navukoŭcy vyśvietlili, što kolkaść antyciełaŭ, jakija źjaŭlajucca ŭ arhaniźmie čałavieka paśla karanavirusa źmianšajecca z časam. Heta moža pastavić pad sumnieŭ doŭhaterminovuju efiektyŭnaść vakcynavańnia, ličać jany. Pra heta paviedamlaje telekanał ZDF sa spasyłkaj na hałoŭnaha doktara infiekcyjnaj kliniki Švabinh u Miunchienie Klemiensa Viendtniera.
Jon raspavioŭ, što analizy kryvi pieršych pacyjentaŭ z karanavirusam, jakija prachodzili lačeńnie ŭ klinicy Švabinh u studzieni, pakazali vidavočnaje źnižeńnie kolkaści antyciełaŭ. «U čatyroch ź dzieviaci pacyjentaŭ my bačym źnižeńnie kolkaści antyciełaŭ pa vynikach testu, jaki možna pravodzić tolki ŭ łabaratoryi z vysokim uzroŭniem biaśpieki», - skazaŭ Viendtnier. Jon dadaŭ, što vyniki hetych daśledavańniaŭ kažuć pra toje, što čałaviek u dalejšym moža zarazicca paŭtorna, adnak pryznaŭ, što pakul upłyŭ, jaki heta moža akazać na kampaniju vakcynacyi, da kanca nie vyvučany.
Da takoj ža vysnovy pryjšli i navukoŭcy z Karaleŭskaha kaledža Łondana, piša Guardian. Jany apublikavali svaje daśledavańni, jakija paćviardžajuć, što kolkaść antyciełaŭ da karanavirusa pamianšajecca na praciahu niekalkich miesiacaŭ paśla pieraniesienaj chvaroby. Daśledčyki nazirali bolš za 90 pacyjentaŭ i pryjšli da vysnovy, što maksimalnaja kolkaść antyciełaŭ źjaŭlajecca ŭ arhaniźmie praz try tydni paśla vyjaŭleńnia simptomaŭ. Paśla hetaha ich kolkaść pačynaje chutka padać.
Navukoŭcy śćviardžajuć, što paśla chvaroby 60% ludziej mieli mocny imunitet da COVID-19, ale ŭžo praz try miesiacy tolki 17% zachavali taki ž uzrovień adpornaści chvarobie. Kolkaść antyciełaŭ skaraciłasia ŭ 23 razy, a ŭ niekatorych ludziej ich nie ŭdałosia vyjavić zusim, piša rbc.ru.