Što my słuchali ŭ červieni — dziesiać najcikaviejšych albomaŭ miesiaca AŬDYJA
Jakoj muzykaj nas zmoh paradavać pieršy letni miesiac?
Run The Jewels — RTJ4
Čaćviorty albom amierykanskaha rep-dueta vyjšaŭ jakraz na chvali pratestaŭ Black Lives Matter u ZŠA, miesedžy jakich supali z palityčnymi pohladami ŭdzielnikaŭ hurta. Tamu Kiler Majk i El-P vyrašyli nie zaciahvać z relizam.
Repiery, jakim užo pa 45 hadoŭ, niečakana stali chedłajnierami rep-sceny ŭ Amierycy. Bumiery adčuli duch času kudy tančej za zumieraŭ.
Luty Sakavik — Bol Jon Moj
Albom ad jašče adnaho dueta, na hety raz biełaruskaha.
8 piesień, jakija bałansujuć pamiž kołdvejvam, sinci-popam i post-pankam. Niervovaja liryka, kantrasnyja vakały Uładzia Lankieviča i Eryka Arłova-Šymkusa, pakručastyja basovyja linii i zapaminalnyja strakatyja sintezatary składajuć firmovaje hučańnie «lutaha sakavika», jakoje z časoŭ pieršaha relizu zrabiłasia bolš ščylnym i važkim.
Norah Jones — Pick Me Up Off The Floor
Novy reliz Nory Džons skłaŭsia z raniej nie vydadzienaha materyjału, i śpiavačka znoŭ dakazvaje, što vytančanaść — u prastacie.
Ale temy, zakranutyja na albomie, dalokija ad prostych i vytančanych. Heta pieśni pra bol, nadziei i vostryja temy kštałtu baraćby žančyn za svaje pravy.
Krasnoznamiennaja Divizija Imieni Mojej Babuški — Katakomba
Paśla vychadu alboma «Uvy» dva hady tamu samabytny rasijski kalektyŭ apynuŭsia amal na miažy raspadu.
Ale źmianiŭšy skład i pieraasensavaŭšy pohlad na muzyku, «Dyvizija» viartajecca z mocnym tancavalnym relizam, jaki moža stać sientymientalnym saŭndtrekam na dva letnija miesiacy.
Phoebe Bridgers — Punisher
Fibi Brydžers zapisała albom, idealny dla sumu. Elehantnaja muzyka z čepkimi miełodyjami i elemientami miakkaha psichadełu. U asnovie — pop-fołk z elektronnym fartepijana, akustyčnymi hitarami, skrypkami, duchavymi i miakkimi bitami.
Vyłučyć takuju muzyku ŭ sučasnaj muzyčnaj prastory, zrabić jaje nie pasiŭnaj, a žyćcieśćviardžalnaj — asobnaja historyja. U Fibi heta atrymałasia.
Bob Dylan — Rough and Rowdy Ways
Tryccać dziaviaty (!) albom u dyskahrafii Nobieleŭskaha łaŭreata, jaki krytyki ŭžo nazvali šedeŭram. Sam Bob Dyłan u 79 hod u dziasiaty raz apynuŭsia na viaršyni muzyčnych čartaŭ, dahnaŭšy ABBA i Queen.
Novyja pieśni praciatyja bijahrafijaj, teałohijaj i mifami, a sam muzyka ŭ ich adnačasova padvodzić vyniki i źjedliva ŭśmichajecca.
Barys Hrabienščykoŭ — Znak Ohnia
Albom jašče adnoj lehiendy. Čarnavyja zapisy dla alboma BH rabilisia na praciahu apošnich dvuch hadoŭ, a hrošy na pracu nad albomam źbiralisia praz kraŭdfandynh. Niekatoryja pieśni publikavalisia jak sinhły ŭ vyhladzie klipaŭ i vyklikali vialiki rezanans.
Apošnija štrychi aŭtar zrabiŭ viasnoj 2020 hoda: pieśni doŭha nie składvalisia ŭ adzinaje cełaje, ale śviet źmianiŭsia praz karanavirus, i albom narešcie skłaŭsia.
Jessie Ware — What's Your Pleasure
Džesi Uejr vypuściła tancavalny błokbastar! Šmat što ŭ hetym albomie addaje daninu ery dyska 70-ch i pop-muzycy 80-ch.
Ale pieśni atrymalisia zusim indyvidualnyja, z vyvieranym bałansam pamiž elektronnym i arkiestravym hukam, a taksama vakałam Džesi, jaki nibyta kliča vas dałučycca da jaje na tancpole.
HAIM — Women in Music Pt. III
Try siastry Chajm na scenie ŭžo trynaccać hadoŭ i vydatna viedajuć, jak heta być žančynami ŭ muzycy i na što hetyja žančyny zdolnyja.
Śviežy materyjał kamanda składała nie ŭ lepšym nastroi. Adna siastra apłakvała zahinułaha siabra, druhaja mahła kinuć muzyku z-za prablem sa zdaroŭjem, a treciaja ŭpała ŭ depresiju i admaŭlałasia ad dapamohi.
Tym nie mienš, Haim zmahli nakiravać niehatyŭ u tvorčaje rečyšča i zapisali šasnaccać piesień. U tekstach — šmat ciemry, smutku i intymnaści. U muzycy — niečakanyja pavaroty nakštałt džazavaha saksafona, rytmaŭ haražnaha roka i repavych partyj.
Enej — A Skiela Wy?
Polski hurt, jaki častkova składajecca z etničnych ukraincaŭ, u svaim albomie znoŭ źviarnuŭsia da narodnych matyvaŭ.
Enej pierazapisali 12 piesień, jakija śpiavajuć u roznych rehijonach Polščy i Ukrainy, dadali da ich dva svaich najbolš viadomyja treki i pierazapisali ŭ sučasnym styli.