Što my słuchali ŭ lutym — dziesiać najlepšych albomaŭ miesiaca AŬDYJA
Jak zaŭsiody, napačatku čarhovaha miesiaca robim ahlad najbolš cikavych muzyčnych relizaŭ miesiaca papiarednaha. Nie abyšłosia biez ajčynnych cikavych navinak.
Green Day — Father of All…
Za svaju doŭhuju karjeru Green Day zapisali ź dziasiatak albomaŭ, atrymali mnostva aŭtarytetnych uznaharod i byli ŭklučany ŭ Zału słavy rok-n-rołu, a ich samy sacyjalna-palityčny albom American Idiot staŭ etałonam u pank-muzycy.
Novaja płaścinka Green Day kardynalna adroźnivajecca ad svaich papiarednikaŭ. Na fonie suśvietnaj paŭsiudnaj ahresii i palityčnych kanfliktaŭ hety albom padajecca niejkaj sprobaj abstrahavacca ad praźmiernaj surjoznaści.
Tame Impala — The Slow Rush
Adzin ź niešmatlikich sučasnych muzyčnych kalektyvaŭ, jaki asacyjujecca z žanram «psichadelika», vypuściŭ pieršy za čatyry z pałovaj hady albom.
Jaho tema — heta rozdumy na temu času: pra jaho chutkapłynaść, pra styl žyćcia, zaklučany ŭ niby viečnaj maładości, a taksama pra toje, jak chutka budučynia pieratvarajecca ŭ minułaje.
Aljans — Kośmičieskije sny
Hurt, zasnavany ŭ dalokim 1989 hodzie, ciapier pieražyvaje druhuju maładość.
Paru hadoŭ tamu eks-kłavišnik «Aljansa» Aleh Parastajeŭ vykłaŭ zapis pieśni «Na zarie» ŭ YouTube. Videa stała virusnym, a pieśnia — papularnaj va ŭsim śviecie.
Napiaredadni svajho 40-hodździa «Aljans» vypuściŭ albom ź pieśniami svajoj novaj ery.
Ozzy Osbourne — Ordinary Man
Lehiendarny Ozi vypuściŭ pieršy za 10 hod solny albom, jaki krytyki ŭžo paśpiašalisia nazvać najlepšym u hetym stahodździ.
Osbarn moh by daŭno adpačyvać na Alimpie błek-mietału, ale 71-hadovy Ozi znoŭ imkniecca dakazać usim i ŭ pieršuju čarhu maładoj aŭdytoryi, što jon jašče žyvy i zdolny stvarać chity.
King Krule — Man Alive!
Brytanski śpiavak i muzyka Arčy Maršał, jon ža King Krule, zapisaŭ albom, jaki ŭjaŭlaje saboj «kalekcyju zdymkaŭ i historyj», što adlustroŭvajuć jaho žyćcio da stanaŭleńnia baćkam.
«Man Alive!» stvorany całkam u instrumientalnym vykanańni samoha aŭtara, za vyklučeńniem saksafona.
Grimes — Miss Anthropocene
Hałoŭnaj hierainiaj novaha alboma Grimes stała «antrapamorfnaja bahinia klimatyčnych źmienaŭ». Antrapacen — heta niefarmalnaje abaznačeńnie epochi, u jakuju čałaviek staŭ hałoŭnym ruchavikom źmienaŭ na Ziamli.
Jak i abiacałasia, płaścinka atrymałasia zmročnaj, ciažkaj i surjoznaj, ale stała dobrym napaminam pra toje, što Grimes ŭ pieršuju čarhu muzyka i artyst, a nie prosta śviecki piersanaž i dziaŭčyna Iłana Maska.
Agnes Obel — Myopia
Nievierahodna pryhožy reliz dackaj pijanistki i vakalistki Ahnel Obiel.
Albom pryśviečany izalacyi ad źniešniaha śvietu i idejna praciahvaje papiaredni Citizen of Glass, u jakim aŭtarka razvažała pra toje, jak technałohii mianiajuć pradstaŭleńnia čałavieka pra pačućci.
Teleport — Padvojnasć
Pieramožcy «Basovišča-2017» vypuścili svoj druhi albom «Padvojnaść», jaki zapisvali ŭ Minsku i Kijevie. Novyja treki možna adnieści da psichadeličnaha roku z upłyvam hranžu.
Five Finger Death Punch — F8
Svoj vośmy albom amierykanskija mietalisty chacieli nazvać prosta ličbaj, ale ŭ vyniku dadali da vaśmiorki litaru F. Ciapier nazvu možna pračytać jak «fejt», što pierakładajecca jak los.
Los luboha mietaličnaha hurta pa zmoŭčańni niaprosty, bo zadavolić patrabavalnuju publiku vielmi składana. A 5FDP prajšli jašče i praź źmieny ŭ kalektyvie. Ale vynik, zdajecca, atrymaŭsia dobrym.
Lera Jaskievič — Muzyka iz karmana
Naša dobraja znajomaja Lera Jaskievič vypuściła svoj novy albom, jaki łakanična acharaktaryzavała jak «pieśni, jakija napisała samo žyćcio».
Panazirajcie, jak mianiajecca tvorčaść Lery pa miery taho, jak jana stanovicca starejšaj.
