Adkryćcio dziaržkinateatraŭ u Minsku adkłali na dva tydni
Premjeru novaha filma Krystafiera Nołana «Dovad», zapłanavanuju na 30 lipienia, pieranieśli jašče na dva tydni. Čakałasia, što mienavita z hetaj karcinaj paśla vymušanych kanikuł viernucca da pracy bolšaść kinateatraŭ dziaržaŭnaj sietki «Kinaminska». Adnak jany zapracujuć tolki z 12 žniŭnia, piša Tut.by.
Pra heta raspaviała načalnica adździeła repiertuarnaha prahnazavańnia i płanavańnia minskaha «Kinavideaprakata» Volha Bahavarava.
Premjeru brytana-amierykanskaha filma Krystafiera Nołana «Dovad» pieranosiać užo druhi raz. Suśvietnaja premjera pavinna była adbycca ŭ siaredzinie lipienia, zatym vychad relizu pierasunuli na kaniec miesiaca. Ciapier prakatčyki nazvali novuju datu vychadu bajevika — 12 žniŭnia ŭ śviecie i 13 žniŭnia ŭ Biełarusi i Rasii. Heta źviazana z paharšeńniem epidemijałahičnaj situacyi z COVID-19 u rehijonach, dzie byli admienienyja abmiežavalnyja miery.
Jak stała viadoma na minułym tydni, dziesiać kinateatraŭ sietki «Kinaminska» płanavali adkryć dźviery dla hledačoŭ 30 lipienia mienavita pakazam navinki Nołana.
Ź pieranosam relizu źmianilisia i daty adkryćcia.
«[Z adkryćciom] pačakajem, bo situacyja źmianiajecca štosiekundna. Ale pakul asnoŭnyja relizy pieraniesienyja na žnivień: 13 žniŭnia pavinna adbycca premjera «Dovada», 21 žniŭnia — «Mułan», — kaža Bahavarava.
U strukturu «Kinaminska» ŭvachodziać 13 kinateatraŭ, 12 ź ich časova nie pracujuć ź siaredziny krasavika. Adkryvać kinateatry filmami, jakija ŭžo byli ŭ prakacie, surazmoŭnica nie bačyć sensu, tamu ŭ kampanii raźličvajuć pryciahnuć hledača voś užo sapraŭdy doŭhačakanaj premjeraj.