U prodaž vychodzić novaja kniha Alhierda Bachareviča
«Apošniaja kniha pana A.», jakuju aŭtar acharaktaryzavaŭ jak kazku dla darosłych, 12 červienia pastupaje ŭ publičny prodaž.
Novy tvor Alhierda Bachareviča ŭtrymlivaje ŭ sabie kala tryccaci roznych historyj, jakija pavodle siužeta raspaviadajucca na praciahu tryccaci dzion.
Vydańnie možna paraŭnać z cykłam «Tysiača i adna noč», «Šlachcicam Zavalnioj» Jana Barščeŭskaha albo navat «Dekamieronam», dzie hieroi raskazvajuć naveły Džavani Bakača na zaharadnaj vile padčas epidemii čumy. «Apošniaja kniha pana A.» adpaviedna stanovicca 500-staronkavym zbornikam kazak dla epidemii karanavirusa, dzie da taho ž možna znajści poviaź z navakolnaj rečaisnaściu.
«Na moj pohlad, u čas karanavirusa hety tvor — kulturnaje vyratavańnie, — kaža vydaviec Andrej Januškievič. — Knihu my rabili pa vyšejšym hatunku i ŭ płanie palihrafii, i ŭ płanie dyzajnu. Jaje pryjemna ŭziać u ruki, pryjemna hladzieć na vokładku ad Natalli Pavalajevaj, u biblijatekach jana pralažyć choć piaćsot hadoŭ».
Vydańnie stała sumiesnym prajektam vydaviectvaŭ «Viasna» i «Januškievič». Jaho možna budzie nabyć u internet-kniharni «Januškievič», kramach «Akademkniha» i «Biełkniha».
Alhierd Bacharevič źjaŭlajecca aŭtaram knih «Nijakaj litaści Valancinie H.», «Šabany. Historyja adnaho źniknieńnia», «Dzieci Alindarki», ramana na dzieviaćsot staronak «Sabaki Jeŭropy», uspaminaŭ «Maje dzievianostyja» dy inšych, tvory piśmieńnika pierakładzieny na dziasiatak zamiežnych moŭ.
