Biełarusy zaśpiavali ŭ anłajnie «Ja naradziŭsia tut»
Hramadskaja kampanija «Hodna» razam z muzykam Sieržukom Doŭhušavym, lidaram hurta Vuraj i stvaralnikam inicyjatyvy «Śpieŭny schod», zapuściła štotydniovy muzyčny prajekt «Śpiavajem Hodna».
Sens jaho: źbirać u anłajn-farmacie biełarusaŭ z roznych kutkoŭ śvietu i śpiavać viadomyja i znakavyja biełaruskija pieśni razam ź ich aŭtarami i vykanaŭcami.
Pieršymi muzykami, ź jakimi aprabavany taki farmat, stali Źmicier Vajciuškievič i Lavon Volski.
U zapisie pieśni «Ja naradziŭsia tut» paŭdzielničali Źmicier Vajciuškievič i 50 biełarusaŭ, jakija žyvuć u roznych haradach Biełarusi, a taksama ŭ Litvie, Hiermanii, ZŠA, Brazilii dy inšych krainach śvietu.
Śpiavajem Hodna sa Źmitrom Vajciuškievičam «Ja naradziŭsia tut»:
Premjera pieśni prymierkavanaja da 20-hodździa supolnaha muzyčnaha prajekta «Ja naradziŭsia tut», jaki byŭ zapisany i vydadzieny ŭ 2000 hodzie.
Premjera pieśni «Pavietrany šar» z udziełam Lavona Volskaha adbudziecca ŭ nastupny paniadziełak, 8 červienia. U zapisie novych piesień moža paŭdzielničać kožny achvotny, dla hetaha treba dałučycca da telehram-kanała i čata «Hodna»: https://t.me/hodnaby.
Tam Siaržuk Doŭhušaŭ budzie publikavać anonsy i instrukcyi pa novych pieśniach, a taksama davać parady jak pravilna śpiavać i hrać, kab Jaŭhienu Ciarenćjevu, jaki ŭ prajekcie adkazny za vytvorčaść videa i huku, było praściej usio heta zvodzić u adzin rolik.
U płanach prajekta «Śpiavaj Hodna» zaprašać viadomych biełaruskich muzykaŭ i štotydniova vypuskać novyja roliki. Kali vam spadabaŭsia pieršy vypusk, to na MolaMola možna padtrymać prajekt, kab jon staŭ rehularnym: https://molamola.by/cmp/7NG
A kali skončycca pandemija karanavirusa, to arhanizatary prajekta chočuć sabrać jaho ŭdzielnikaŭ i hledačoŭ, kab užo ŭ žyvym farmacie narešcie razam zaśpiavać hučna i hodna.
