Łukašenka padpisaŭ ukaz pa ipatečnym kredytavańni žylla
Alaksandr Łukašenka 16 krasavika padpisaŭ ukaz numar 130 «Ab ipatečnym žyllovym kredytavańni». Dakumient pryniaty ŭ metach udaskanaleńnia dziaržaŭnaj žyllovaj palityki i stvareńnia dadatkovych umoŭ pa zabieśpiačeńni pravoŭ hramadzian, jakija atrymali kredyt na žyllo, paviedamlaje BiełTA.
Fota Nadziei Bužan.
Ukazam ustanaŭlivajecca, što pradmietam ipateki moža vystupać tolki žyllo, zarehistravanaje va ŭstanoŭlenym paradku, u tym liku i nabytaje na druhasnym rynku žyłoj nieruchomaj majomaści. Pry hetym ipateka budzie raspaŭsiudžvacca taksama na ziamielny ŭčastak, na jakim raźmieščana nabyvajemaje žyllo.
Zhodna z dakumientam, bank zmoža nakiravać spahnańnie na pradmiet ipateki tolki pry adnačasovym parušeńni dźviuch umoŭ kredytnaha dahavora: kali zavinavačanaść pa asnoŭnaj sumie doŭhu pierasiahaje 10 pracentaŭ ad sumy dadzienaha kredytu, a taksama praterminavanaja zavinavačanaść pa asnoŭnaj sumie doŭhu i pracentach za karystańnie kredytam składaje bolš za 90 dzion (u vypadku śmierci kredytaatrymalnika - bolš za 9 miesiacaŭ).
Hramadzianie, jakija prachodziać terminovuju vajennuju (abo alternatyŭnuju) słužbu, zmohuć skarystacca adterminoŭkaj pahašeńnia zavinavačanaści pa ipatečnym žyllovym kredycie i pracentach za karystańnie im na pieryjad słužby.
Bankam dajecca pieršačarhovaje prava na zadavalnieńnie niavykananych abaviazacielstvaŭ pa žyllovym kredycie za košt pradmieta ipateki. Patrabavańni inšych kredytoraŭ, zabiaśpiečanyja załoham hetaha žylla, buduć zadavolvacca paśla poŭnaha pahašeńnia daŭhoŭ banka. Hetyja miery naceleny na toje, kab stymulavać banki da vykarystańnia ipateki jak asnoŭnaha sposabu zabieśpiačeńnia vykanańnia abaviazacielstvaŭ pa žyllovych kredytach.
Akramia taho, z pryniaćciem ukaza sproščana rehistracyja załohu: bank samastojna nakiroŭvaje nieabchodnuju infarmacyju ŭ terytaryjalnyja arhanizacyi pa dziaržaŭnaj rehistracyi nieruchomaj majomaści.
