Što my słuchali ŭ studzieni — dziesiać najlepšych albomaŭ miesiaca AŬDYJA
Niezaŭvažna pralacieŭ pieršy miesiac novaha hoda. Muzyčnyja hihanty pakul nie paradavali svaich prychilnikaŭ navinkami, ale ŭ studzieni dakładna nie było sumna. Jak zaŭsiody, pryvodzim najbolš cikavyja relizy ŭ našym topie.
Apocalyptica — Cell-0
Dla pracy nad svaim papiarednim albomam Shadowmaker finski kalektyŭ u svoj skład zaprasiŭ śpievaka Frenka Piereza. Adychod ad kłasičnaha ŭjaŭleńnia pra Apocalyptica jak pra instrumientalny hurt razzłavaŭ fanataŭ, chacia albom atrymaŭsia vydatnym.
U vyniku heta vyliłasia ŭ pieršy za 17 hadoŭ całkam instrumientalny albom. Takim čynam finy pasprabavali viarnucca da vytokaŭ i adnačasova dadać novych farbaŭ u svaju tvorčaść.
Mac Miller — Circles
Repier Mak Miler pamior padčas pracy nad hetym albomam, jaki pieršapačatkova musiŭ stać praciaham psichaterapieŭtyčnaha alboma Swimming, dzie liryčny hieroj vučyŭsia płavać, kab nie patanuć.
U albomie Circles hieroj nibyta chodzić zaŭsiody pa kruhu. Hety pasył moh by być davoli banalnym, kali b nie staŭ miesedžam paśmiarotnaha alboma.
Eminem — Music To Be Murdered By
Maršał Brus Meters III niečakana vypuściŭ svoj adzinaccaty albom. Jak i z papiarednim relizam, nie było anijakaj rekłamnaj kampanii.
Eminiem, jak zaŭsiody, pravakatyŭna i złobna aśviatlaje prablemy i śviežyja rany amierykanskaha hramadstva, zastajučysia ledź nie apošnim voinam chip-chop sceny, pakul Snup Doh piša kulinarnyja knihi, a Džej Zi vystupaje na padpieŭkach u žonki.
Ale pytańnie: ci patrebny tamu hramadstvu, jakoje ciapier lubić prymityŭny chip-chop, taki Eminiem? Ci nie vyhladaje novy albom burčańniem złobnaha dzieda?
Bombay Bicycle Club — Everything Else Has Gone Wrong
Ravarysty viarnulisia paśla čatyrochhadovaha pierapynku sa śvietłym i pazityŭnym albomam. Ź im dobra pračynacca ŭ vychodny dzień, ładzić špacyry abo jechać u horad mary. Za heta ich i lubiać: jany zachoŭvajuć svoj styl u muzyčnym viry, dzie pryniata pastajanna mianiacca.
Boris Brejcha — Space Diver
Adzin z najbolš viadomych niamieckich elektronščykaŭ Barys Brejča stvaryŭ svoj ułasny žanr «chaj-tek minimał» na miažy techna, transu i chaŭsu, u jakim stvaraje ŭžo amal dva dziasiatki hadoŭ.
Space Diver — heta jahony dziaviaty albom, u jakim jon raskazvaje pra toje, što było dla jaho važnym u apošnija hady.
Pet Shop Boys — Hotspot
Znakamity duet pracuje pavodle pryncypu: «Nie treba ramantavać toje, što dobra pracuje». Udzielnikam Pet Shop Boys užo za 60, ale jany nie imknucca maładzicca, zastajučysia samimi saboju, i radujučy prychilnikaŭ novymi relizami.
Bohren & der Club of Gore — Patchouli Blue
Jak my zrazumieli z historyi Barysa Brejčy, niemcam dosyć sumna stvarać u miežach adnaho žanru, i jany stvarajuć sabie novyja.
Bohren & Der Club Of Gore ličacca pačynalnikami žanru dark jazz — sumiesi embijentu, roku i džazu. Muzyka atmaśfiernaja, pavolnaja, tryvožnaja i depresiŭnaja.
Dubioza Kolektiv — #fakenews
Viedajecie pra dziki zachad? Dyk trymajcie ž pryvitańnie ź dzikaha ŭschodu ad samaha viadomaha hurta Bośnii i Hiercahaviny. Dubioza Kolektiv — heta haračy kaktejl sa ska, rehi, chip-chopu i bałkanskich matyvaŭ na vostrasacyjalnyja temy.
Hurt pryncypova vykładvaje svaje albomy ŭ adkryty dostup i mužna zmahajecca z epochaj spažyvańnia.
P****filmy — Eto projdiet
(aściarožna, u pieśniach jość niecenzurnaja leksika)
Za 10 hadoŭ svajho isnavańnia «PF» prajšli šlach ad repietycyj u haražach da sołd-aŭtaŭ na hałoŭnych placoŭkach i intervju ŭ Dudzia. Ale papularnaść tolki dapamahaje hałoŭnamu na siońnia pank-hurtu Rasii danosić miesedžy ab aktualnych prablemach hramadstva.
Cima Biełaruskich — Moja kaśsieta — tvoj piervyj disk
Jak i letaś, u apošni dzień studzienia Cima Biełaruskich vykłaŭ u sieciva svoj novy albom.
Pieśni ź letašniaha «Ukantakcie» prasłuchali bolš za 1 miljard razoŭ, ciapier čarha bić rekordy novamu albomu.
A što vy słuchali ŭ studzieni? Pišycie ŭ kamientarach