Adam Michnik: Łukašenka — heta taki dyktatar, jaki ŭtrymaŭ niezaležnaść Biełarusi jak dziaržavy
Hałoŭny redaktar polskaha vydańnia Gazeta Wyborcza i były dysident Adam Michnik naviedaŭ Vilniu, i na prośbu žurnalistaŭ delfi.lt skazaŭ niekalki słoŭ pra situacyju ŭ Biełarusi.
Michnik skazaŭ, što nie viedaje dakładna, čamu Łukašenka nie pajechaŭ u Varšavu na mierapryjemstvy, pryśviečanyja 80-hodździu pačatku Druhoj suśvietnaj vajny.
«Tolki jon viedaje, čamu nie pajechaŭ. Ale ja dumaju, što istotna na jaho rašeńnie paŭpłyvała toje, što nie pajechaŭ nichto z Maskvy. Pa-mojmu, heta było peŭnym čynam u kantekście adnosin Pucina. Ź inšaha boku, mnie zdajecca, što Pucin by nie pryjechaŭ», — skazaŭ polski redaktar.
Michnik upeŭnieny, što ŭ Łukašenki jość adčuvańnie vialikaj zaležnaści ad Pucina.
«A kali b jon pajechaŭ, to na hetym by ničoha nie zarabiŭ», — skazaŭ redaktar Gazeta Wyborcza.
U Michnika padčas pajezdki nie skłałasia ŭražańnie, što Biełaruś — dziaržava zapałochanych ludziej.
«Sa mnoj razmaŭlali narmalna, vielmi adkryta. Biez stracha. Ja byŭ va ŭniviersitecie, sustrakaŭsia z moładździu. U mianie było vielmi pazityŭnaje ŭražańnie, kali vieści havorku pra hramadstva», — skazaŭ były polski dysident.
Taksama Michnik parazvažaŭ pra rolu Łukašenki.
«Skłałasia mierkavańnie, što Łukašenka — heta taki dyktatar, jaki, adnak, utrymaŭ niezaležnaść Biełarusi jak dziaržavy. Tak pra jaho buduć uspaminać. Što heta nie kryvavy dyktatar, nakštałt jak u Turkmienistanie abo Tadžykistanie, abo Uźbiekistanie. Heta krychu inšaje. Heta nie azijackaja dyktatura. Viadoma, mnie heta nie padabajecca. Adnak u jaho jość adčuvańnie, što jamu bližej da Pucina, čym da Stalina», — skazaŭ redaktar.
«Nie chacieŭ by, adnak, ličyć, što pra jaho možna havaryć takoj samaj movaj, što i pra dyktatury nakštałt kamunistyčnaj. Tut niešta inšaje. U hramadstvie bolš šyroki viejer svabody. Ja bačyŭ u kniharni raznastajnyja knihi. Čuŭ vielmi adkrytyja dyskusii. Biznes byvaje dastatkova niezaležnym. Heta dazvalaje adčuvać umierany aptymizm u adnosinach da budučyni: navat Łukašenka nie viečny. Navat Stalin nie byŭ viečnym», — adznačyŭ spadar Michnik.