U Breście adkryli novy aŭtavakzał: sucelna šklany. Voś jak jon vyhladaje FOTY
Na novy adras brescki aŭtavakzał pierajechaŭ u noč na 28 maja. Da hetaha jon raźmiaščaŭsia na vulicy Mickieviča pobač z rynkam. Pieršym adpraviŭsia z novaha aŭtavakzała aŭtobus Minsk — Varšava. Jon adbyŭ z płatformy №13 roŭna ŭ 03.00.
Prapusknaja zdolnaść novaha bresckaha aŭtavakzała — 5 tysiač pasažyraŭ. Transpart prymajuć 13 pasadačnych płatformaŭ, jakija znachodziacca z boku čyhunki.
Centralnuju častku budynka zajmaje zała čakańnia na 250 pasažyraŭ. U adnym kryle raźmiaščajucca kafe, kamiery dla bahažu i prybiralni, u inšym — biletnyja kasy.
Na pryvakzalnaj terytoryi jość parkoŭka na 88 miescaŭ, praviedziena tralejbusnaja linija.
Infarmacyjnyja stendy i šyldy na novym aŭtavakzale ŭ Breście aformleny na ruskaj, anhlijskaj movach i, jak i abiacali, na biełaruskaj. Abjavy taksama ahučvajucca na troch movach. Sam nadpis na budynku taksama zrobleny pa-biełarusku — «Aŭtavakzał Brest».
Novy aŭtavakzał znachodzicca pobač z čyhunačnym. Prajekt, jaki raspracoŭvała AAT «Paleśsiežyłbud», praduhledžvaŭ mahčymaść złučeńnia dvuch vakzałaŭ z dapamohaj padziemnaha pierachodu. Adnak biudžet, vyłučany na aŭtavakzał, u pamiery 11,5 młn rubloŭ pravieści padziemku nie dazvoliŭ. Jaje budaŭnictva pakinuli na budučyniu.
Płatformy na starym aŭtavakzale na Mickieviča ciapier pustujuć. Što budzie na hetym miescy, pakul što nieviadoma. Padčas prezientacyi detalovaha płana histaryčnaj častki Bresta ŭ minułym hodzie ahučvalisia prapanovy pieraabstalavać abjekt pad handlovy kompleks z prybudovaj šmatuzroŭnievaha parkinha.
