Adkryty list futbalistu Palakovu: Dzianis, nie treba stavić Radzimie nahu na šyju
Biełaruski futbalist Palakoŭ: Dziakuj Łukašenku i Pucinu za novy limit, my praktyčna adna kraina
Dzianis Palakoŭ u centry. Fota Siarhieja Zinina.
Dzianis, pryvitańnie!
Mianie kličuć Ivan Karaičaŭ, ja siem hadoŭ pracavaŭ u spartyŭnym pijary i zaŭzieju za naš futboł z 1984 hoda. Ja zaŭzieju za našu zbornuju z samaj pieršaj hulni, z tavarniaka suprać Ukrainy. Byŭ na hulni suprać «Luksiemburha, amal što płakaŭ paśla pieramohi nad Hałandyjaj, ściskaŭ kułaki, kali narviežcy ŭsio ž dacisnuli našych na pieršym aficyjnym vyjeździe.
Dzianis, z momantu adnaŭleńnia niezaležnaści majoj krainy ja zaŭzieju za ŭsie našyja kłuby ŭ jeŭrakubkach. BATE, minskaje «Dynama», «Ataka-Aŭra», «Fandok» — mnie pofih, tamu što ź Biełarusi. Majoj krainy, za jakuju sotni tysiač, a moža, i miljony hatovyja hałovy skłaści. Heta ŭnutry čempijanatu ŭ nas svaje simpatyi, časam bieskampramisnyja, a voś za miežami u nas adna kraina, adzin patryjatyzm i navat adzin jeŭrakubkavy rejtynh.
Vy (budziem na vy) zimoj pierajšli ŭ jekaciarynburhski «Urał». Zrazumieła: bolš vysoki status lihi, u jakoj milhajuć značna bolš cikavyja ličby. A na minułym tydni, vy, Dzianis, skazali adnu frazu, i ja adrazu padumaŭ, što vy nie padumali. Davajcie dla pačatku pracytuju, a to nie ŭsie čytali: «Daviedaŭsia, što biełaruskija futbalisty nie buduć ličycca lehijanierami pazaŭčora ŭviečary, kali źbiraŭsia na zbory. Viadoma, spačatku ŭzradavaŭsia, heta pryjemna. Ź inšaha boku, takija razmovy chodziać daŭno, tak što, pakul zakon nie prymuć i aficyjna nie pryznajuć, radavacca rana. Užo dva-try hady takija razmovy chodziać. Viadoma, udziačny Łukašenku i Pucinu za takoje rašeńnie. My praktyčna adna kraina, u nas adzin narod, jość Mytny sajuz, siabroŭskija adnosiny prezidentaŭ, tamu para było da hetaha pryjści — chakieisty ž nie ličacca lehijanierami ŭ Rasii. Dumaju, heta łahičny krok».
Vy ž heta skazali, Dzianis? Nie ananimny pisar z pres-słužby kłuba niedzie daloka, a vy asabista. Viadoma, niama ničoha drennaha ŭ tym, kab adčuvać simpatyi da Rasii. Moža być, karani, a moža być — niešta čałaviečaje, a moža być, pracadaŭca, ci ŭsie razam. Nie mnie sudzić. Tak, jość palityčnyja adnosiny. Šmat chto ŭ Biełarusi maje narmalnyja adnosiny da Rasii. Ale praktyčna adna kraina? Jakoha čorta?
Hladzicie, jakaja štuka. Dumaju, i navat upeŭnieny, što vašaja fraza ŭvachodzić u dysanans (zacanicie słova) z sutnaściu nacyjanalnaj zbornaj Biełarusi. Hladzicie, Dzianis, my ŭsio ž asobnaja kraina. Tak, my de-jure ŭvachodzim ŭ Sajuznuju dziaržavu, ale heta nie padstava stavić svajoj Radzimie nahu na šyju.
U kastryčniku 1992-ha ja ŭ samym pieršym matčy zaŭzieŭ za Biełaruś suprać Ukrainy, a nie za Sajuznuju dziaržavu suprać Ukrainy.
U 1994-m ja radavaŭsia razam z usimi paśla ciažkaj, čaho ŭžo tam, ale takoj znakavaj viktoryi suprać Luksaŭ.
A ŭ 1995-m, pamiatajecie pacanom, tak? Pieramožyšča nad stomlenymi paśla finału Lihi čempijnaŭ hałandcami, jak kaža metr, ale tym nie mienš. Pamiatajecie kłasny tady (ja nie žartuju) kamientar Navickaha? Pamiatajecie ściahi na trybunach? Pahuhlicie, cikava.
Dy što tam 90-ja. A razhrom Polščy ŭ 2001-m? A hieraičny vyjezd u Italiju, kali vazili ŭ 2004-m i cudam prajhrali? A naohuł uvieś adbor z 0-2 Ukrainie doma, kali ŭvieś stadyjon vieryŭ u bandu Małafiejeva, u Valika i Chaca? Dziasiatki tysiač sercaŭ rvalisia razam z vystupam zbornaj na futbolnych palach. Heta była zbornaja Sajuznaj dziaržavy? Nie, Dzianis, Biełarusi.
Dzianis, vy nasrali svajoj zhadanaj vyšej pramovaj mnie ŭ samaje serca. I kali vas vypuściać u asnoŭnym składzie zbornaj Biełarusi na adboračnych hulniach (a ŭ Kryvušenku ŭ hetym płanie lohka vierycca), dyk ja vyklučaju TB i idu hulać. Razumieju, što mnohim naplavać, ale mnie — nie. Vy vyjdziecie na pole i nie ŭzhadajecie pra Ivana Karaičava, a ja pra vas, Dzianis, uzhadaju.
Dzianis, u nas adna kraina. I jana nijak nie nazyvajecca Sajuznaja dziaržava. I soramna, Dzianis, što takich pramovaŭ ad vas nie było, pakul vy nie pierajšli da rasijskaha pracadaŭcy.
Naša Radzima, Dzianis, nazyvajecca Biełaruś. I zbornaja ŭ nas, Dzianis, Biełarusi.
Dzianis, heta važna, hladzicie, nie pierabłytajcie.
