Былы міліцыянер трапіў у апублікаваную базу супрацоўнікаў: Пачаліся непрыемныя пытанні ад знаёмых і былой дзяўчыны
Апошнім часам у інтэрнэце публікуюцца персанальныя звесткі супрацоўнікаў міліцыі.
Тэлеграм-каналы апублічваюць імёны, тэлефоны, у нейкіх выпадках фотаздымкі, нумары машын і нават адрасы меркаваных супрацоўнікаў.
На адзін з такіх зліваў «Нашай Ніве» паскардзіўся былы супрацоўнік сталічнага крымінальнага вышуку, які звольніўся летась — па яго словах, апублікаваныя базы — старыя, але наступствы ён адчуў на сабе.
Ён расказаў, што ў адзін з дзён зайшоў у тэлеграм і ўбачыў у адной з баз сваё імя (ён не хоча выступаць адкрыта, але прадаставіў Рэдакцыі пацверджанні таго, што ён сапраўды служыў і быў звольнены у 2019 годзе па пагадненні бакоў — «НН»).
Пасля таго, кажа былы супрацоўнік, яму давялося перажыць пару непрыемных момантаў у сувязі з цікавасцю знаёмых.
«Праз некаторы час мне піша мой сябра са школы, потым — былая дзяўчына, з якой мы вельмі мірна і пяшчотна разышліся, засталіся ў добрых адносінах, потым яшчэ знаёмы, потым калега з работы.
Калега дык ведаў, дзе я працаваў раней, асабліва не выказваў нічога, хіба што пацікавіўся, ці не працую я пад прыкрыццём. А былая дзяўчына спачатку наўпрост не пыталася, але ў агульных знаёмых пачала цікавіцца, ці працую я яшчэ ў міліцыі. Прыйшлося ўсім тлумачыць, што ўжо звольніўся і не маю дачынення да таго, што цяпер адбываецца», — кажа афіцэр запасу.
Мужчына наракае, што некалькі разоў звяртаўся да адміністратараў тэлеграм-каналаў, каб прыбраць сваё імя. Але атрымалася гэта ці не з шостай спробы.
