Карэйскае агенцтва расказала пра сустрэчу беларускага дыпламата з паўночнакарэйскім калегам
У Пхеньяне прайшлі перагаворы намеснікаў міністраў замежных спраў Беларусі і КНДР, у рамках якіх бакі вырашылі ўмацаваць кантакты на высокім узроўні, а таксама ўзмацніць эканамічнае супрацоўніцтва.
Беларуская дэлегацыя ў Пхеньяне. Фота: yonhap.news
Як паведаміла Цэнтральнае тэлеграфнае агенцтва Карэі, 18 красавіка ў сталіцы КНДР адбыліся перамовы паміж намеснікам міністра замежных спраў краіны Ім Чхон Ілем і намеснікам кіраўніка МЗС Беларусі Яўгенам Шастаковым, які 16 красавіка нечакана прыбыў у Паўночную Карэю.
У ходзе перагавораў бакі дамовіліся ўмацоўваць кантакты, у тым ліку на вышэйшым узроўні, «у адпаведнасці з патрэбамі зменлівага часу», а таксама актыўна прасоўваць супрацоўніцтва ў эканамічнай і культурнай сферах.
Беларусь і КНДР таксама маюць намер узмацняць узаемную падтрымку на міжнароднай арэне для далейшага пашырэння і развіцця «традыцыйных дружалюбных адносін і супрацоўніцтва паміж дзвюма краінамі», піша ЦТАК.
Адзначаецца, што бакі абмяняліся думкамі па рэгіянальных і міжнародных пытаннях, якія маюць узаемную цікавасць.
Намеснік міністра замежных спраў Беларусі Яўген Шастакоў і асобы, што яго суправаджаюць, прыбылі ў Пхеньян 16 красавіка. Беларускія медыя, а таксама МЗС візіт не анансавалі, мэты візіту Шастакова не раскрывалі.
Чытайце таксама:
Віцебскі выкладчык даказаў «слушнасць» ідэй Кім Ір Сэна, яго ўзнагародзілі ў КНДР
Кім Чэн Ын заклікаў «як ніколі» рыхтавацца да вайны і вывучыў макет Сеула
