Праз мяжу на ровары. Наколькі гэта можа сэканоміць час
Самы танны, а разам з тым і самы хуткі спосаб перасячэння мяжы — ехаць праз яе на ровары. Пацікавіліся, колькі часу займае такі праезд.
Ілюстрацыйны здымак. Фота: «Наша Ніва»
Польша
Трапіць у Польшчу на ровары не ўдасца, бо абодва пункты пропуску, якія дагэтуль працуюць, не прадугледжваюць перасячэння мяжы на гэтым відзе транспарту.
Літва
У пункце пропуску «Прывалка» раварысты маюць прыярытэт толькі з беларускага боку мяжы.
Беларусы прапускаюць раварыстаў і матацыклістаў без чаргі. Такія падарожнікі могуць адразу пасля запуску на тэрыторыю пункта пропуску рухацца да пагранічнікаў і праходзіць пагранічны і мытны кантроль. Але пасля праходу беларускага пункту пропуску, раварысты і матацыклісты стаяць у адной чарзе з легкавымі аўто. Праз гэта праезд мяжы на ровары стае не такім хуткім, як гэта было раней, пакуль літоўскі бок таксама прапускаў веласіпеды і матацыклы асобна, а не патрабаваў стаяць у адной чарзе з аўтамабілямі.
Аматары ездзіць праз мяжу на ровары праз «Прывалку» кажуць, што на праход мяжы ў адзін бок сыходзіць ад 1,5 да 3 гадзін.
У пункце пропуска «Беняконі» праехаць праз мяжу на ровары можна значна хутчэй. Калі адмысловых чэргаў з веласіпедыстаў няма, то на абедзве граніцы можа сысці хвілін 20, кажуць чытачы.
У Каменным Лозе па назіранні падарожнікаў сітуацыя падобная да Прывалкі. На літоўскім баку часцяком ставяць раварыстаў у адну калейку з легкавікамі. На беларускім баку мяжы ровары стаяць у асобнай чарзе. Праз гэта па словах падарожнікаў праезд праз гэты пункт пропуску на ровары можа заняць і некалькі гадзін.
А вось на Лошы з легкавымі аўто на ровары стаяць не трэба. Там існуе асобная чарга для тых, хто перасякае мяжу на ровары. У залежнасці ад загружанасці пункта пропуску, на праезд сыходзіць ад 15-20 хвілін.
Латвія
Таксама на ровары можна перасячы мяжу з Латвіяй. Веласіпедысты там не стаяць у супольнай чарзе з машынамі, дый самі чэргі на латвійскім кірунку бываюць не заўжды. Таму праехаць праз мяжу звычайна займае ад 15 да 30 хвілін.
Чытайце таксама:
Стаяць 30 гадзін на польскай мяжы ці ехаць круг 700 км праз Літву?
Падпісаны ўказ аб міжнародным аўтастрахаванні. Што змянілася?
