Лукашэнка павіншаваў Пуціна з днём нараджэння, сказаўшы, што шануе як надзейнага сябра Беларусі
RT
Аляксандр Лукашэнка павіншаваў Уладзіміра Пуціна з днём нараджэння. Сёння Пуціну спаўняецца 68 гадоў.
«Унутраная і знешняя палітыка, якая праводзіцца пад вашым кіраўніцтвам і накіраваная на эфектыўнае сацыяльна-эканамічнае развіццё Расіі, павышэнне яе аўтарытэту і ўплыву ў свеце, карыстаецца шырокай і несумненнай падтрымкай грамадзян. Яркім пацвярджэннем гэтаму з'яўляюцца вынікі выбараў у адзіны дзень галасавання 13 верасня 2020 года», — гаворыцца ў віншаванні.
Аляксандр Лукашэнка адзначыў, што высока шануе Уладзіміра Пуціна як надзейнага сябра Беларусі і паслядоўнага прыхільніка пашырэння інтэграцыйных працэсаў на лініі Саюзнай дзяржавы, якія ў поўнай меры адпавядаюць намерам двух брацкіх народаў сумеснымі намаганнямі будаваць годную будучыню.
«Перакананы, што адносіны стратэгічнага партнёрства паміж Беларуссю і Расіяй, у аснове якіх ляжаць шматгадовыя традыцыі дружбы, салідарнасці і ўзаемнай падтрымкі, будуць і надалей эфектыўна развівацца», — падкрэсліў кіраўнік дзяржавы.
